呢幾日遇到嘅朋友，或者來電話傾偈者，都不約而同話多謝《蘋果》，有啲重話已經轉咗睇我哋份報紙。噚晚去遮打花園採訪集會，佢哋一聽到係《蘋果》記者，就話香港好彩重有《蘋果》，真係有點受寵若驚。
去7.9集會者唔少係專業人士，八方問兩位女士點解要嚟，其中一位氣沖沖反問：「7.1去咗遊行表示對政府不滿，到今日7.9，你話老董做咗乜嘢？」另一位就加多句：「我一定嚟，直至佢做嘢為止。」
真係一針見血，董先生應該去聽一聽。轉個頭，竟然見到一個似曾相識嘅面孔，企喺遮打花園中間做直播，原來真係CNN嘅MikeChinoy。八九年喺天安門廣場八方日日見到佢，亦經常聽到以上似曾相識嘅對白。啲外國記者返晒嚟，係好定唔好呢？
民主運動係一場持久戰。7.1及7.9之後，民主發展網絡今個星期日（七月十三日）下晝又接力，喺中環遮打行人專用區舉行2003民主大會。負責人之一嘅夏其龍神父話，陳日君主教、梁家傑大律師、全國人大代表李鵬飛已答應上台演講。司徒華同張文光都會出席，齊齊朗讀大會宣言，要求當局立即就2007政改展開政制檢討，以免到時又好似23條諮詢咁唔夠時間，草草了事。
（圖）八九年喺天安門採訪6.4新聞嘅CNN記者MikeChinoy，噚晚亦有到立法會外做直播。
傳真︰2623-9278
電郵︰