麥當勞巨無霸，大家可能都食過，但係有冇諗過，唔止係食物咁簡單？重可以顯示入住全球各大城市一晚酒店嘅價值。英國倫敦嘅酒店相當貴，住一晚，平均要用一百一十個當地巨無霸嘅價錢，排第一位。
巨無霸指數排第八位嘅香港，住一晚酒店，相當於六十三個巨無霸，以香港一個巨無霸要十一個半計算，約莫七百二十五蚊。
蘭西查過，呢個價錢，可以入住旺角京華國際酒店商務客房一晚，費用係六百八十蚊。
不過，若果去墨西哥城，只需要四個當地巨無霸，就可以享受一晚酒店服務，聽落好似幾吸引。
用巨無霸價格作為全球同一樣嘢嘅比較指數，係由雜誌「經濟學人」發明，至於今次列出全球城市入住酒店巨無霸指數嘅，係仲量聯行。
標誌為維港門廊之一嘅八十八層高國際金融中心二期，入伙紙五月批出，新地等將物業執到靚靚後，終於喺今日邀請傳媒去參觀。
唔講唔知，據發展商交畀政府嘅資料，國金二期建築費超過二十六億元，平均每方呎只係一千三百多元，就算加埋利息同雜費等，再加埋九九年尾，達成嘅香港站二至四期發展補地價嘅平均地價每方呎一千五百多元，估計總成本呎價都係四千二百元。
就算真係如市場所講，呎租二十元（新地一直否認㗎！），回報率都有六厘，同市場差唔多。
講番新地，佢哋剛成立七百人義工隊，名為「新地義工TEAM力量」，義工來自不同部門。
地產代理為鼓勵員工盡力跑數，會搞好多唔同形式嘅活動，發展商亦會畀面出席。例如利嘉閣上半年有錢賺，所以前晚喺尖沙嘴NewayPub搞慶功宴，一邊唱K一邊飲酒，實行玩餐飽；聽講嘉華同嘉里都有代表嚟湊熱鬧。
至於中原，前日舉行荃灣朗逸峯慶功宴，嘉華地產董事總經理呂耀華親身到場祝賀。
另外，世紀21精英會就喺大欖田夫仔村搞野戰比賽，共有四十個精英參加，藉此提升員工自信。
跑馬地舊樓友園，一個高層單位最近易手，由財務公司怡泰富以三百九十萬賣出。單位一千二百呎，呎價三千二百五十蚊，單睇價錢，冇乜特別。
不過，蘭西查到單位嘅一手業主原來係資深投資者，七二年以二百八十萬蚊買入友園八個單位，平均每個三十五萬。投資者一直居住於頂樓，其餘全部出租。揸住三十幾年，以為一早供斷，點知近排陸續有三個單位俾財務公司收番，以銀主盤形式拍賣，包括啱啱成交呢間。代理話，呢位資深投資者已遷出物業，其餘五個單位好大機會放售。
蜚聲國際嘅中國鋼琴演奏家實在唔多，最近有大家都認識嘅李雲迪，而較資深嘅有孔子後人孔祥東。
深圳黃埔雅苑會所落成，和黃邀請孔祥東喺會所開辦珠三角區首間孔祥東音樂藝術中心。孔先生講，佢細個學琴好苦，因為窮，阿媽用紙畫琴鍵畀佢練琴，兼為老師做衫當學費。講完後即席彈咗一段黃河鋼琴協奏曲畀大家聽。
蘭西
電郵地址：
