記者：梁佩芬 攝影：陳智良
場地提供：V6、King'sBar
女拳手DiDi酒筲箕唔怕醉
「阿媽、男朋友、同學，人人叫我唔好做女拳手，話我得嗰21歲，成日飲酒好傷身，但我就係鍾意飲！」DiDi一坐低就話自己猜枚唔叻，但就隨時可贏番兩鋪唞氣解酒！
中五畢業後，做過Sales就開始當女拳手，「可以飲酒，又可以同人嘻嘻哈哈，寓工作於娛樂，咁好嘅工邊到搵呀？」DiDi曾當過啤酒Promoter，點解兜兜轉轉又做番拳手？
「Promoter睇落幾好搵，幾粒鐘有幾百蚊，但要着住件馬騮衣通街走，我覺得好瘀，最慘試過喺大牌檔Sell酒，件膠衣又焗又厚，大汗直流到大髀，你想減肥就去做啦！」
看着她坐在冷氣超勁的酒吧，與客人談天說地，笑到見牙唔見眼，輸晒狂飲都嘻哈大笑，原來DiDi有獨門飲不醉秘方：「當你愈開心自然飲得愈多，亦無咁易醉，所以客人愈開心Order愈多，我就愈好搵！」好橋！
啤酒PromoterSuyi天賦笑容好Sell得
相反，做了兩年多啤酒Promoter的Suyi最憎做女拳手，原來佢唔可以俾人「大」，試過有客人見佢連輸十幾鋪，Suyi即時面燶燶，重俾客取笑，Suyi二話不說，一口氣飲晒成杯酒，結果，整晚攬住廁所嘔。之後，自知不適合當拳手，索性轉行做Promoter。
有時，我都好憎酒吧Promoter，覺得好煩！Suyi一聽，大笑說：「我都好怕Sell人，但可能樣子甜美，把聲又夠嗲，通常一行埋去問：『先生，要唔要……』還未講完啲客就自動自覺：『嚟住一打先！』哈哈，我覺得最緊要笑容燦爛，見到都樂意飲多兩打！」原來，做酒吧靚女，首要條件係識「笑」！
Sell功凌厲的Suyi，也有冷場：「足球直播嗰時，雖然坐無虛席，但個個都只顧睇波，求其叫一打就算。諗住中場休息會叫酒啦，個個唔係去廁所，就係講波，我一見有足球直播，就唔想返工！」