自幼離家與祖父母居內地
Miki畫筆插眼皮險變盲妹

女子組合MiniCookies的楊愛瑾（Miki）自小喜歡畫公仔，連去街都筆不離手。三、四歲時Miki更因拿着畫筆走路跌倒，險變盲妹，幸好筆只插中眼皮位，留下一道小小的疤痕。

組合MiniCookies成員之一的Miki在家中排行最細，只得一個哥哥，但父母卻從沒有偏心這個孻女。

要風得風
Miki一歲時父母因工作關係，將她送往內地與祖父母居住一年，小小年紀離鄉別井的Miki在內地居住期間，初嘗萬千寵愛集一身的滋味。
Miki說：「因為全屋得我一個細路，所以我鍾意食乜同買乜，佢哋都會即刻買畀我，好彩我冇因此而俾寵壞。」
談及兒時最難忘的事，Miki憶起險些變成盲妹的經歷，她日前說：「嗰時我啱啱學行路，已經好鍾意拎住支筆喺張紙度畫公仔，就連同媽咪去街，我都要揸住支筆。」

父母擔心
Miki續說：「點知有次行街我唔小心跌低，支筆就咁啱插咗落我嘅眼皮位，如果冇記錯，當時我好似有入醫院，慶幸支筆唔係插落啲，如果唔係我就真係會盲，不過自此之後我都學乖咗，唔會再帶住支筆行街街，費事又發生意外。」
Miki又表示，初入行時，要和其他Cookies成員搬到公司安排的宿舍，當時父母都十分擔心她未能照顧自己，幸好現在Miki已搬回家，以後父母不用再擔心其起居飲食。
採訪：駱華齡