來自加拿大嘅年輕搖滾女歌手AvrilLavigne呢排紅到爆燈，有見及此，EMI唱片公司最近搵咗個啱啱先夠十五歲嘅加拿大rock女Skye出嚟，勢要捧佢成為AvrilLavigne嘅勁敵。早幾日Skye好秘密咁嚟咗香港，喺唱片公司嘅內部會議入面，對住東南亞區啲高層同傳媒表演，佢重落力得滯搞到春光乍洩㖭！
我大口羅拉早幾日就潛入咗呢個EMI唱片公司喺山頂搞嘅東南亞區音樂會議，當晚嚟自星、馬、泰、韓、台、內地同埋香港嘅唱片公司高層雲集，亦有傳媒到場，大會除咗邀請嚟自克羅地亞嘅現代鋼琴家Maksim表演之外，重首次介紹新人女歌手Skye出場。
年紀細細嘅Skye都幾有同鄉AvrilLavigne嘅rock味，佢着住短裙仔喺台上又唱又跳，踎低嗰陣重唔小心走光㖭！
雖然Skye係走搖滾路線，但係佢扭扭擰擰嘅台風，就似足同門師姐KylieMinogue咁風騷，佢嘅眼神相信亦可以電死唔少麻甩佬！