港股似乎已發展到乜嘢工業股都可以炒得一餐嘅境況。上個月公布業績後大跌嘅萬威國際（167），好快已經重拾升浪，去番之前嘅高位，噚日微升1.09%，收0.93元。
萬威上個月公布全年業績，盈利升8%，有1.5億元。當時老闆娘公開話過公司有大把錢，所以毋須批股集資，大股東亦無意減持。
經紀陳話，有證券行見家陣流行工業股，而萬威表現亦唔錯，兼夾有啲電訊科技概念，呢排納指勁升，科技股熱炒嘅情況下，萬威實在有得諗，所以佢哋死心不息要求批股，美其名叫做增加公眾流通量。
講起批股，高寶綠色（274）在5月初批股後，傳過利淡消息，股價受壓好一段時間，但近排亦重拾升勢，噚日大升5.7%，收1.30元。
經紀陳話，隻股唔排除又想添食搞批股，聽聞今次唔會好似上次咁批到一街都係貨，而係搵咗個大隻佬做策略性投資者，不妨留意吓。
慕容小初