堅持在七月最後一個立法會議完成國安法立法程序嘅陣營，提出一個新講法，就係香港人嘅最大優先係反貧困，唔係反廿三條（人大代表王敏剛語），通過廿三條之後，香港就可以全心全意搞經濟。
其實搞好經濟與反廿三條可以同時進行，通過廿三條與搞經濟有乜邏輯關係？梗係冇啦。特首上台後，搞足六年，失業率越嚟越高，唔通一有國安法，佢就識得治理經濟？笑話啦。王人代又話「平生不作虧心事，夜半敲門也不驚」，用以諷刺反廿三條人士，當然又係攞嚟講，正人君子唔做犯法事唔等於政府可以立法限制人權、自由吖嘛。
反貧困與反廿三條可以同時進行。七月一日五十萬人上街遊行，冇貧富階級之分，全部人士一條心，就係反董、反廿三條。遊行過後，當晚成個中環嘅食肆都塞滿人，茶餐廳內盡是黑衣客，個個身水身汗，面有倦容但有笑意，一望而知就係遊行人士。賓架陳行完之後，走去史丹利街陸羽食晚飯，路經「老地方」、「史丹利快餐」呢兩間茶餐廳塞到滿瀉，心諗上陸羽就坐得舒舒服服啦。哈，點知陸羽地下二樓亦係坐滿黑衣客，賓架陳惟有排隊，陸羽夥計話平時假期，陸羽晚市水盡鵝飛，所以三樓休息，萬萬料不到七月一日晚，會做到手軟，廚房幾乎冇貨賣。賓架陳話七一遊行，無論有冇錢嘅人，都湧上街，反董反廿三條，無階級之分！