謝霆鋒日前同父母細妹一齊喺溫哥華為嫲嫲賀壽，噚日朝早七點半佢一個人返到香港，一身黑色中山裝，拎住一個手提袋，除咗助手同記者外，只得一個fans嚟接機。
但唔知係咪喺飛機十幾個鐘，機上空氣乾燥得滯，馮仁昭見到霆鋒gel咗少少嘅頭髮，有少少頭皮屑，馮仁昭將目光向下移，嘩，個膊頭都有唔少頭皮屑喎。其實霆鋒嘅女友王菲做過洗頭水廣告代言人，對護理頭髮應該有啲心得，霆鋒應該向女友請教吓。
問霆鋒送乜嘢畀嫲嫲賀壽，佢話：「冇買到，有心就得。」有指霆鋒嫲嫲向佢催婚，霆鋒話：「係咩？佢冇同我講，我唔知。」問佢打算幾時結婚，霆鋒笑住話：「擇日囉。」霆鋒話今次王菲冇去溫哥華，問到嫲嫲識唔識佢呢個天后女友，霆鋒話：「佢應該識得王菲，佢兩個冇見過面。」問王菲有冇打電話向嫲嫲道賀？霆鋒就話：「呢啲唔話畀你知。」
江芷妮噚日喺太古坊幫化妝品牌資生堂示範秋冬新妝容，佢話自己唔係代言人，但幫佢哋做模特兒就試過幾次，佢哋亦有贊助佢。
對於近日正拍攝嘅古裝電視劇《樊梨花》，江芷妮話覺得好好玩，成班演員相處得好開心，一啲是非都冇，有人問同劇嘅宣萱今次有冇搞是非？江芷妮即刻話冇，重話大家好到連嗰日冇戲份嘅演員，都會買消夜去探班，不知幾好感情咁話。
蕭芳芳噚日到港台接受訪問時，呼籲家長唔好阻止兒子手淫，佢話：「因為呢一個係一種正常嘅發洩，總好過出去侵犯人。」此外，芳芳姐透露耳患冇好轉迹象，角膜近日又發炎，影響工作，佢話：「我下個月會去美國睇一個耳專科，佢哋會用雷射降低我耳鳴嘅情況，我又可以順道送埋個女入學。」
黃凱芹同蔡潔雯噚日喺將軍澳排演拉丁舞，黃凱芹一手抱起重一百一十六磅嘅蔡潔雯，重擺甫士畀記者影相。問黃凱芹夠唔夠力，佢話：「成隻舞都係得一吓，不過佢可以再減少少。」但蔡潔雯已經減咗十幾磅，黃凱芹知道之後好愕然，而且知道自己講錯嘢，於是不斷話：「唔係啊，佢條腰都幾好攬，我唔覺得佢肥，咁樣兜得唔得啊！」
蒙嘉慧同洪欣因為拍《功夫足球》成為好朋友，噚日佢兩個就一齊去新城接受訪問。呢個暑假之後，洪欣個仔就返幼稚園，但佢話囝囝好黐身，一見佢化妝就知道佢要出去，於是扭計要去波波池玩，洪欣話都會盡量滿足佢。蒙嘉慧就話劇集《衛斯理》收視唔理想，可能係科幻劇唔係咁吸引，但好彩好多人讚佢好啱做白素。
