港股噚日重上萬點大關爭持，恒指收10027，升34點，成交保持在126億元水平，反映游資持續入市，不過受惠於成交上升的港交所（388）反而回軟，跌0.4%，收12.35元。
太平地氈（146）私有化計劃告吹，噚日復牌冇成交，按盤價1.39元，喺冇成交下大跌逾10%。據聞今次私有化唔成功，主要係近期港股轉勢回升，令其他股東心雄，加上大股東嘉道理對地氈業務前景唔係太睇好，所以出手唔慌高，與其硬闖最終被小股東否決，倒不如自行擱置。由此可見，嘉道理深明進退之道，比阿董聰明得多。
東方海外（316）愈跌愈深，噚日一度跌逾10%。e莉莎用好抵死嘅口脗同阿虎講，此股下挫，唔係因為投資者驚阿董失勢，而係驚佢做番公司掌舵人。
近排真係好興匿名信投訴新上市公司，而且好多都係股民入咗票認購後至上市前發生，股民想退票都唔得，就算公司作出澄清或否認指控，但通常一掛牌就大瀉，捧場嘅股民損失不菲，認購新股又多重風險。唔該各路英雄有嘢投訴要早啲，誰是誰非阿虎唔在乎，但最緊要唔好連累街坊。今日上市的力豐（387）亦有匿名信投訴，今次唔知又有幾多股民遭殃？
德祥系噚日復牌，只提及由錦興（275）與保華德祥（498）聯手，以每股0.10元向中策（235）提出全面收購。
Charles對德祥系的重組及精簡大計似乎唔係太急進，另一角度睇，德祥系動作陸續有來，可以睇住。
阿虎