Hesther--學生
放學後立即趕來參加集會，自製了一個紙牌，將董建華及葉劉淑儀畫成魔鬼模樣，要求擱置23條及董建華下台，「董建華上台咁多年嚟，完全幫唔到香港。」
莫先生--司機
「要延續未完成工作，7.1有遊行，只係踏上第一步，23條只係延遲，未撤銷。」他自製了兩個紙牌，一個寫着「打倒港奸」，再將曾鈺成的名字打上交叉，另一寫着「打倒工賊」，將梁富華打上交叉，又將紙牌放在地上，歡迎任何人士踐踏。
鄧小姐--僱人士
家住長洲，趕出來參加集會，「盡一己責任話畀政府知應該做乜嘢，政府係愚民政策，顛倒黑白是非，冇公義。」認為押後23條立法不足夠，因為政府對條文的解釋誤導市民，希望擱置立法。
何小姐--秘書及會計
雖然工作很忙，但放工後立即趕來，「23條令香港冇晒自由，對將來嘅細路仔影響好大，7.1遊行咗，立法押後，今日照來，驚靜靜哋就咁過咗，其實押後都唔滿意，23條根本唔應該存在。」
李先生--公務員
與妻子及七歲兒子一起參加集會，「對政府太失望，施政冇樣滿意，23條影響好大，令未來完全唔明朗，今次帶埋個仔嚟，一來係公民教育，二是希望董建華落台，香港至有希望！」
劉先生--組織統籌員
7.1亦有參加遊行，昨晚再參加集會是要反23條及反董建華，希望董建華下台，「董建華管治咁多年，香港經濟一直走下坡，民不聊生，施政冇樣掂，今日唔企出嚟，對唔住香港人。」
黃小姐--廣告撰稿員
「7.1遊行之後，董建華仍然冇出嚟回應市民訴求，佢話聽到市民聲音，但冇做任何嘢」，政府的表現完全不負責任，策略亦冇構思及仔細考慮，直至田北俊宣布辭職才決定押後立法，令人覺得田北俊和政府在「扯貓尾」。
張先生--維修技工
「出嚟表達要有真正自由，自己有思想，有主見，出嚟集會遊行，冇受人誤導。」23條立法會限制香港人的自由，令港人沒有將來，董建華的施政亦有很大問題，一事無成，最好董建華下台。
王先生--商人
自費四千元印製了二十件印着「老董執政六年，香港衰足六年」的反董T恤及帽，鼓勵公司的同事參加昨晚的集會，「對董建華施政唔滿意，23條諮詢唔夠，好多市民唔知乜回事。」
吳小姐--醫院秘書
在離島上班，放工專程乘船趕出中環參加集會，「7.1都有參加遊行，今日嚟繼續支持，希望政府可以盡快全面直選，咁遠都要出嚟，唔只反23，唔滿意董建華施政。」
梁靜婷--城大文學系一年級學生
反對23條「夾硬嚟」，也不滿政府過去數年的施政措施。7.1大遊行當日她身在香港仔圖書館當兼職，對未能參與五十萬人大遊行感到失望，昨天晚上她身處遮打花園時說：「好開心自己是其中一分子，可以話畀政府聽，我對你都有不滿㗎。」
廖先生--從事廣告推廣設計
「反對23條，最重要嘅係法例方向唔正確，將人民嘅自由剝奪，妨礙民主發展，完全係好冇理由，7.1遊行係香港整體人民嘅力量，無論點都好，大家要出嚟推動民主。如果23條落實，係社會進步嘅倒退。」
Leon--小學五年班學生
他每日都看報紙及網上新聞，近日很留意23條立法的消息。「我明日要考（考試）常識同作文，重有少少未溫完。我有去7.1遊行，今次再嚟，係要強烈表示反對23條，因為佢係會囚禁人民嘅暴政，封鎖新聞自由。」
黃太--家庭主婦
需要坐輪椅的黃太，與先生及六歲女兒Cato一家三口，晚上七時前已抵達遮打花園。「我嚟係反對23條，爭取香港民主自由，因為香港民主倒退緊，政府管治愈來愈似中國大陸，話五十年不變，其實好似已經變咗。」
陳先生--待業人士
雖然二十年前交通意外導致傷殘而要坐輪椅，陳先生昨日依然專程由元朗趕往中環參加靜坐。「特首做啲嘢太過不民主，獨斷獨行，經濟唔好，民主大倒退，做好多嘢都令人睇唔過眼，雖然23條押後，但係都唔滿意個諮詢程序。」
王先生--保險從業員
把螢光棒扭成天使光環般頂在頭上的王先生說，靜坐時感受到香港人的和平與團結。「7.1有去，今次再嚟，係想政府知道香港人好願意表示反對23條嘅態度，用腳嚟投票，唔係有啲人講嘅政治棋子，真係希望政府聽民意先通過23條。」
潘小姐--社會工作輔導員
昨晚參加靜坐的人數比想像要多，令她很感動，「原來咁有堅持嘅人係唔少嘅，董建華做得咁差，令咁多人走出嚟，我想佢下台，其他官員當然包括葉劉淑儀，身為一個公僕咁唔聽民意，值得炒；楊永強連累人命問題，一定要辭職。」
李太--文員
李太與任職建築管理的丈夫一起參加靜坐，她強調「希望集會去到𠵱度會有圓滿嘅結局，條例最終會修改切合大部份人嘅意願，而唔係幾個人嘅諗法。」
黃小姐--成衣出口公司職員
因為有反對23條的共同理念，黃小姐與三位同事放工前用一小時自製四條抗議標語，表達心聲。「港人凝聚倒董心，惡法條文成憂慮，無才無德卸責任，次次失誤次次甘。」黃小姐坐在地上說：「好開心，有好多人都支持（反23條）。」
陳蕭美蓮--寫字樓「阿嬸」
參加集會是盡公民責任，董建華管治六年來，害了很多人，自己工作亦很辛苦，政府帶頭減薪，她的老闆亦跟隨減薪，23條立法後，說話的自由會慢慢喪失，「今日唔出嚟，子子孫孫會過得好辛苦！」
葉先生--空運業
葉先生認為雖然23條作出修訂，但仍然陷阱多多。他自言「飲共產黨奶水大」，覺得香港現在欲跟從共產黨步伐，擔心自己將來言論會受威脅，「立法後，我驚到時隨時俾人『砌生豬肉』都唔知發生乜嘢事呀！唔出嚟反對到時香港都唔知變成點！」
彭小姐--新聞系學生
彭小姐亦有參加7.1大遊行，她覺得自己既然是念新聞學，就要關心時事，23條對整個新聞界影響很大，亦擔心會影響到自己的前途，「我好驚遲啲會大興文字獄囉！𠵱家政府美其名話保護國家安全，實質就係迫到啲新聞界乜都唔敢寫。」
鄧婆婆--退休人士
鄧婆婆今日去靜坐，很大程度是因為她曾受過共產黨時代被迫害之苦。她擔心香港會變回文革時代的中國，鄧婆婆自言對政府亦是極度不滿。「個董建華搞咗咁耐都搞唔好經濟，我兩個仔都冇嘢做咗好耐，我已經六年冇買過新衫，遲啲連飯都冇得食！」
吳小姐--侍應
因為政府施政不妥，搞不好經濟，她一家都受減薪之苦。「我真係覺得呢個政府好唔掂呀！六年都搞唔好啲經濟，我全家都被迫減人工，又要交稅，咁我哋全家食乜呀？唔通食風呀！所以我今日要嚟話畀個政府知，我對佢好不滿呀！」
黎奕藍--小六學生
雖然我唔係好知23條係啲乜，不過我都覺得唔緊要，因為政府自己都講唔清楚。今日我同媽咪嚟，係想爭取一吓我自己嘅權利，個政府乜都唔畀，第二時我連崇拜偶像都要同政府解釋，好麻煩呀！」
鄭小姐--設計師
鄭小姐參與7.1遊行及今次集會，都是想反23條。她直言一旦23條立法後，「好似『沙士』咁，如果政府乜都唔俾人講，又唔俾新聞界報道，咪變咗初期中國爆『沙士』咁囉！死咗我都唔知發生乜事呀！一定唔可以俾23條立法。」
盧小姐--學生
盧小姐父母已失業了好一段日子，現時只靠積蓄過活。她批評董建華六年都解決不了失業問題，擔心自己畢業後亦未能找到工作。「我𠵱家會擔心冇學費交，畢咗業之後，又擔心搵唔到嘢做，又要還政府嘅貸款，我都唔知點還啦！到時真係『負資產』！」
古小姐--待業
古小姐之前是做出版行業，如果23條通過後，將影響新聞及出版自由，亦可能會有不少出版社效法《信報》聲言結業或裁員。「啲出版社倒閉晒，我都唔知點搵嘢做，我重想做番啲同出版有關嘅工作㗎！所以23條係唔可以通過㗎！」
陳先生--退休人士
陳先生雖然行動不便，但仍堅持參加7.1遊行及今次集會。他不滿政府官官相衞，令他投訴無門，董建華的無能令香港更加不濟。「我自己都有番咁上下年紀啦！我都唔怕死，但係我唔想我嘅下一代會遭殃。我唔想佢哋一抗議就會俾人拉去坐監。」
胡先生--負資產人士
胡先生一家已成為負資產一羣，他直指香港經濟一日比一日差，九七前後已有很大分別，他們全家的生活質素亦大不如前。「𠵱家啲人工又少咗，層樓又跌晒價，又係供咁多錢，生活真係好艱難。」
