曾經創造賣樓神話嘅馬灣珀麗灣，已經入伙一段日子，聽講會所嘅兩個池畔燒烤爐，因環境一流，有專人幫手起爐，同做事後清潔工作，所以好受歡迎，搞到啲住客要凌晨去排隊至訂到位。
另外，曾經係賣樓宣傳重點，設喺會所嘅AngsanaSpa，據聞因為未有牌照，所以到𠵱家都未能開張。
珀麗灣個會所受歡迎，會所一到假日就人山人海，要戴證至可以入去玩。
蘭西問新地，佢哋話，屋苑預備了六個燒烤爐，住客可以喺活動二十一日前登記，先到先得，呢個形式獲大部份住客認同。至於個Spa，因為要等政府審批，管理公司至可以駐場。申請手續已經做緊，進展理想。不過，實際啟用日期就冇提到。
中原地產促銷天水圍慧景軒同屯門名賢居，都做到好成績，聽講市場佔有率達六成。喺年初至升做呢兩區高級區域經理嘅方啟明，表現出色，最近重升埋做助理營業董事。
方啟明透露未來大計，就係會加強二手。另外，亦計劃喺有前景嘅地點開設分行。中原屯門同天水圍區共有七間分行。
佢入行十幾年，最難忘係大旺市時同大炒家入貨，經常通宵達旦；重有係九八同九九年嘅艱難歲月；同埋近年主打新盤。
話咁快又過咗半年，亦係代理行頒發成績表嘅時候。美聯物業噚日就舉行咗千人聚會，喺九龍灣展貿中心搞頒獎禮同全體大會，氣氛熱鬧。
上半年盈利最高大獎落在九龍區手上，由集團主席黃建業頒發畀董事羅國安。「超越Quota」大獎由將軍澳李志成同郭玉滿奪得。
利記嘅中西半山同樣召開大會，公布上季成績。其中，羅便臣道分行嘅黃塋栺（Angela）奪得6月份最高營業額冠軍。
長實搞記者會一向有新意，每次都會迎合唔同主題搞場景布置。不過，以往嘅道具重點落喺介紹個樓盤，例如搞豪宅新盤，就會整到記者會現場金碧輝煌。如果主題係送車優惠，就會安排好多車嘅相片，總之，場景百變。
講起百變，就自然想起長實賣樓主帥趙國雄，佢近排要四圍飛，去完上海又要去新加坡，噚日佢唔喺香港，映濤軒個記者會就索性整咗個趙生「實物原大嘅紙板人」，等大家都可以見到佢，同佢一齊影相。趙生可謂無處不在。
蘭西
電郵地址：
