中央對港府擱置23條立法保持緘默，如果呢種態度維持不變，外資有信心香港可以保持一國兩制，繼續成為中國對外開放的國際城市，資金亦會放心流入。
港股噚日持續造好，雖然未能守於萬點關口之上收市，全日仍升100點，收報9992，成交126.76億元。e莉莎話，如果阿董落台就更加好，唔少市場人士關心阿董去留多於關心中移動（941）成交因何大增至11億元，賭佢落唔落台重開心過賭波。不過，阿虎就希望各界畀番少少面中央，勿讓新上場嘅胡溫派承受太大壓力。
阿董家族嘅東方海外（316），承接力似乎愈來愈弱，股價再跌3.8%，成交減至159萬元，手上有貨真係要小心。地產股造好，不過曾經係半隻地產股嘅地鐵（066）就斯人獨憔悴，股價挫2.55%至9.55元。政府諗住協調兩鐵推出發展項目，甚至收回項目發展權，將直接影響地鐵未來盈利，日後派息亦可能減少。不過，事情未必咁簡單，唔好忘記港府係地鐵大股東，有關協調或收回發展權可能被視為關連交易。此外，若地鐵董事在此事上未有盡力為股東爭取利益，亦可能被股東控告，所以孫公今次都幾難做。
萬順昌（1001）噚日果然發力，大升8.7%，收報1.62元，成交達1035萬元。
至於獲得惠理（VP）基金入股5.94%嘅華豐環保（364）只保持平穩，升1.18%，收0.86元。黑客話，華豐就快會開車，不妨留意。
阿虎