七月一日，五十萬人上街，沙田陳師奶帶領細路，在沙田第一城飲茶後出發。上茶樓梗係要買報紙，陳師奶走到報檔，只見《蘋果日報》好似識得飛咁，逐張飛出門口，陳師奶不敢怠慢，飛撲埋去搶番一張。原來有好多黑衣人搶購《蘋果》，至於對手咯喎，因為對遊行比較冷淡，人們也比較對它們冷淡，一堆堆咁坐在報攤上曬光管太陽，沙田第一城係中產階級屋邨，《蘋果》係特別好賣啲，因為支持23條嘅，多數係教育程度低啲嘅。
陳師奶去到九龍塘地鐵站轉車，再到金鐘轉車落銅鑼灣，只見人潮洶湧，根本行唔郁，車廂內好多都係黑衣人。平時搭地鐵，見到咁多人，必定會擠得透不過氣來，但此日人同此心，好靜，好有禮貌，陳師奶不禁對自己啲細路講：「香港人嘅優點出晒嚟！」呢一課公民教育對佢啲細路真係好重要。
到咗銅鑼灣，路上水洩不通，警察唔准行，於是成千上萬人罰企個多小時，但冇人嘈噃！你話香港啲警察幾易做呢。換轉係巴黎，相信已經打到人仰馬翻。企到腳軟之後，開始准郁，陳師奶等人跟大隊行到遮打花園就散水，只見遮打花園內有一個甚麼《舞出香港新天地》嘅活動，一啲細路在台上跳舞，台下好似有好多菲傭坐響度休息，啲細路跳乜舞都冇人理，當然佢哋亦唔會跳得精采，政府要凸顯歌舞昇平，特登租地方畀不知名社團搞活動，煞費苦心，但係冇人得益呢。