SCE一向都有唔少創意爆棚嘅Game，如《花火》、《骰仔熱爆》等均屬叫好叫座之作，更相繼推出續篇，受歡迎程度可見一斑。而今個夏天嘅創意續篇有呢款《蚊2》，不但女仔貪佢簡單好玩，估唔到連男機迷都忍唔住要煲機，細看之下，原來一眾男士覺得化身成一隻蚊，潛入女仔睡房、浴室等地方，肆意狂咬身上每一角落，相當之有快感，呢點都算係《蚊2》嘅獨有特色喇。
記者、攝影：徐影龍
ImageGirl：小蕙
逢星期一至三、五出版
遊戲類型：動作
對應機種：PS2
遊玩人數：1人
開發商：SECI
售價：$288（行貨）
基本上遊戲玩法同上集差唔多，都係以吸取足夠血液而過關。遊戲抵死好玩之處，就係一開始要偷偷飛埋目標人物度，再伺機降落其身上吸血，男士們就認為呢Part最好玩，事關不時要喺胸口、裙底等位置飛過，滿足晒佢哋潛在嘅慾望。筆者訪問其中一位不願露面嘅機迷Sam，佢居然話：「《蚊2》梗係好玩啦，我最享受搵位吸血嗰陣，猛轉個R3掣係咁吸，好有快感，不過通常貪心吸多咗，俾佢發覺後一掌拍死，可算係死得轟烈！」
喺吸取血液途中，往往都會俾人發現，無可避免要嚟一場人蚊大戰，對方會用手、殺蟲水、甚至壘球棍作攻擊，呢個時候靈活控制變得好重要，分分鐘俾人拍死就前功盡廢。
上集故事背景集中喺日本嘅山田一家人度，今集講佢哋中咗獎券，免費到夏威夷旅遊度假，不但背景移至充滿陽光與海灘嘅夏威夷，而且重新加入Brown一家人，實行㗎妹、鬼妹齊齊針，而兩家人嘅故事背景同過關方法亦不盡相同。《蚊2》增加人物角色外，連蚊都有新品種登場，除舊有嘅日本蚊，重新加入美國蚊，兩者扮相都好抵死，能力亦各有不同，如吸血速度、飛行速度等，隨玩家任意揀嚟用。值得一提係Opening動畫，老竇山田健一扮到成個Rambo咁款，上晒武器如臨大敵，而一架武裝直升機由遠飛近，大戰一觸即發，睇清楚啲原來只係上集隻抵死吸血蚊，搞到好似《黑鷹十五小時》咁凝重。
上集獨沽一味玩吸血，《蚊2》就好有創意咁加入穴位概念，每個人物都有唔同嘅潛在病痛，弱點穴位亦各有不同，當中有兩種情形須攻擊其指定穴位；第一係每當不幸被人類追殺時，除周圍飛逃命外，亦可積極啲，冒險攻擊其指定穴位，成功後人類就會忽然鬆弛起嚟，表現得好「崎摩痴」，唔再喊打可憐嘅蚊。第二項用途屬過關條件，某個角色會有一種或多種病徵，對症下藥狂攻相應嘅穴位，自然可順利過關，如頭痛就專攻「肩貞」穴、貧血就攻「京門」穴。估唔到蚊都可以咁偉大，吸完人血重可以醫人，可算係相當之有良心。