今日正好係全新寶馬5系，全球發布登場嘅大日子。早前，我哋《車天車地》版曾經為大家率先披露過，呢款屬第5代新類型高級行政座駕嘅詳情，惟經過汽車傳媒廣泛報道後，車迷始終無法得知新車駕駛嘅真實感。然而，我哋《車天車地》版有幸獲得邀請，成為亞洲首度作同步實地測試新5系嘅香港傳媒；究竟呢款屬第5代嘅新款寶馬5系新車，響多個同級對手環伺下，有甚麼過人之處能夠突圍而出呢？而備受車迷注目嘅操控同乘坐感，又能否凌駕對手呢？有興趣嘅車迷，就真係唔好錯過今次機會，跟我哋一齊嚟先睹為快喇！
記者：陳偉林、鄭達基 攝影：周旭文、陳偉林
ImageGirl：Bessie 部份圖片由寶馬汽車提供
逢星期一至日出版
較7系更前衞、更富誘惑性嘅Bi-Xenon雙圓頭燈組合，大幅面弧形結構，除予人炯炯有神之感外，更可會是魅力沒法擋。
具有革命性改變嘅寶馬新5系，造型跟上一代可謂截然兩樣，除保留有雙圓車燈跟電鍍鬼面罩屬FamilyLook設計外，車體輪廓卻滲入不少7系嘅筆觸，響一派溫文爾雅嘅體驗中，帶出一份時尚美及活力感。大幅面帶有弧形設計嘅頭尾燈，具備高透光率之餘，而且重好有一種搶眼奪目氣魄，除能令人留有深刻印象外，前後一體式大型氣霸及整流設計，匹配四輪大口徑18吋合金胎軨連RunFlat輪胎，更能凸顯出車子本身嘅一份動感來。向來寶馬各個車系，喺不同時期均有其獨特門邊電鏡組合，而呢部簇新530iA，車身兩旁就裝有高斜角嘅低風阻鏡殼配搭，還帶有防雨滴功能㖭！
舊有車款如日產，曾經響較大型轎車身上，裝有CorningLight組合，以助晚間轉向時，有更廣闊及清晰嘅視野。惟新5系Xenon頭燈，響夜間行車會依據軚盤轉向調校角度，以減低盲點出現。
秉承着7系嘅優良設計，整個車廂布置均見得簡約和諧，車身兩邊門壁線條流暢，手枕位未見突出但承托力十足，前後兩排高級皮座全屬人體工學剪裁，既貼身軟滑又見承托感，各備有獨立頭枕、又有大型中央手枕組合，而頂級版嘅前座頭枕，更備有7系嘅活摺式設計，予人有更佳妥貼性。然而，前排更備有全方位電控，重包括有頭枕高低同腿墊前後伸縮調校㗎！講到設備，又點可以唔提到一套i-Drive裝置，惟經過廠方改良後，操作變得更簡單直接，利用旋鈕同屏幕組合，大可操控恒溫冷氣、音響、電子導航，重有免提電話等組合㗎！此外，當然唔少得重有一套嶄新嘅SmartAirbags八氣袋連充氣簾幕組合，大可因應撞擊力度調節安全氣袋嘅充氣大細，兼且重會調校安全帶嘅預索力度呢！
操控盡在指間
新5系用上沿用於7系嘅i-Drive裝置，並屬改良嘅精簡版本，操作介面容易調控，以中央手枕上嘅旋鈕，配合中控台上嘅屏幕使用。
乘客大可利用呢套i-Drive裝置，選控恒溫冷氣、電子導航，甚至係免提電話及高級AV組合。