暢銷電腦遊戲《盜墓者羅拉》最新一輯《TombRaider：TheAngelofDarkness》啱啱喺上個月推出，據聞反應好好，而改編自呢個遊戲系列嘅電影《盜墓者羅拉：生命之匙》，亦會喺今個月二十五號喺美國上畫，三十一號就輪到香港開畫。
事隔兩年，我呢個冒牌羅拉都好想睇吓仍然由安琪蓮娜祖莉（AngelinaJolie）扮演嘅羅拉有乜嘢驚人演出。《生命之匙》除咗由擅於處理動作場面嘅《生死時速》導演占迪邦（JandeBont）執導外，其餘九成班底都係同上集一樣。
今集羅拉周遊列國，上天下海，動作場面多多，相信一眾機迷都會對佢更有親切感，而飾演羅拉嘅安琪蓮娜一時展示馬上英姿，一時又喺水底大戰，不過至養眼都係佢着住件黑色比堅尼，騎住水上電單車喺希臘愛琴海上飛馳！
對於會唔會拍《盜墓者羅拉》第三集，安琪蓮娜話：「只要觀眾鍾意呢個角色，拍多幾部我都冇問題。佢哋已經諗咗好多第三集嘅橋段，有啲我重希望𠵱家就可以拍到！」