23條成為全城焦點，大家好似已經唔記得早排沙士搞到人心惶惶嘅日子。香港人咁善忘，令到俾醫管局委任做非典檢討委員會主席嘅夏佳理頭都大晒，因為委員會早前呼籲市民就醫管局處理沙士失誤提供資料，以便調查，但只收到十份資料，委員會惟有再賣多輪廣告。
夏佳理話如果冇資料喺手，要展開調查質問醫管局高層都唔易，為咗令唔方便或唔識字市民都可提供資料，佢話可以搵專人去收集意見，而且絕對保密。打過電話去電台報館訴苦嘅市民，唔該幫幫手啦。
講開沙士，中大同港大兩個醫學院拼個你死我活。之後港大即刻出咗本特刊，詳列港大抗炎佳績；中大最近亦出咗本名為「齊抗炎、齊關心、齊盡力」嘅特刊（圖），羅列中大過去幾個月嘅臨床工作、科研成果、社會服務之類嘅工作。當然唔少得中大畢業嘅謝婉雯醫生，佢被中大校長金耀基形容為「中大的光榮」。
傳真︰2623-9278
電郵︰