今個星期旺角AV場返咗部好煞食嘅MP3機TRULYMP381，感覺有幾分MD機Feel，尺寸為60×60×12.8mm，最搶都係佢機面嗰4行中文顯示屏，除咗出歌手歌名外，重可以同步顯示歌詞，簡直同卡拉OK有得揮。顯示屏上重裝有一塊採用納米技術嘅抗磨損玻璃鏡面，包保顯示永遠清晰靚仔！
內置128MB記憶體，閒閒哋錄到2個多小時嘅WMA或MP3音樂，重有FM收音機功能，最鬼馬係可以邊錄邊聽！唔係太多MP3機有㗎。另一賣點係內置即壓MP3音樂功能，能將所有經音頻連接埠輸入的聲音，直接壓縮成MP3格式，免去好多電腦軟件操作手續。跟機重多送一個電話錄音轉駁器，可幫你錄下重要電話資訊，行政人員最啱使。
記者、攝影：朱崇德