巴士上公仔箱內的免費節目未必個個啱睇，但近日卻在乘車途中因聽到一句「早知結果，何必當初」，便從半睡中睜大雙眼看個究竟，原來是久違了的廉署廣告。由早在1975年的小販帶仔女去舉報、泥膠人變大鱷、到最近在電視上仍有播放的枱底交易都有睇。不過，無論你記得睇過邊幾個，尤其是六七十年代的，還是不要說出來，無謂透露你的年齡秘密啦。
記者：招佩珊 攝影：梁細權
逢星期一、三至五出版
每晚無論有幾眼瞓都會「撐」大雙眼追深夜重播的電視劇，自覺舊好睇過新，唔追唔得。而近日喺巴士上卻發現另一個值得一「追」的新目標，就是家陣喺電視機無機會再睇得番的廉署廣告。走訪了廉署一趟，方知道原來他們為明年踏入三十周年，製作了6集合共有24個廣告的《經典廉政廣告篇》短片。
劉先生：「馬、馬、呢隻係馬，但個畫面係隻鹿，呢個指鹿為馬嘅廣告就最記得。」
其實，自1975年第一個廣告《小販》至今，廉署一共製作了57個廣告，至於點選出最後出街的24個，負責今次這個特輯的監製Phoebe（廉署社區關係處副總傳媒創作主任）就話，之前在「集思會」上已收集了市民意見，「我哋亦會選出主題較鮮明，或者有經典名句的廣告如『早知結果，何必當初』，輯錄喺呢6集短片內。」問到喺社區關係處工作了3年的Phoebe，有邊個廣告印象最深刻，她選擇了《指鹿為馬》，「製作其實好簡單，不停播放隻鹿身上不同部份，但有把大人聲不斷話呢隻係馬，最後聽到把細路女聲都話係馬，覺得好得人驚。」
記者問過幾個街坊，發現除了對幾個較經典廣告如隻鹿、鱷魚等有印象外，其他就唔多記得，反而隨口就講到「早知結果，何必當初」、「有貪污，必有禍害」，其實，這都是出自廣告內的口號，原來這些經典名句重「紅」過廣告。但數到經典中的經典，當然非「香港勝在有ICAC」，而這句口號正正是出自《指鹿為馬》。
廉署的廣告製作是由該署的社區關係處負責，除了要度內容外，拍攝手法都要花心思，在該部門工作了6年的Winnie（廉署社區關係處署理總教育及宣傳主任）舉例：「《貪污大鱷》呢個廣告喺美國拍攝，係用仿真泥膠將人形公仔變成鱷魚，總共拍了1,700格菲林，係當時首個電視廣告有呢種拍攝手法。」另外，較近期的一輯廣告《檯底交易》（即有兩個人企在一張大枱下交換公事篋），睇過的朋友都以為是「做手腳」，經電腦移花接木，但其實大家所見到的，確實是張十幾呎高的大木枱，可惜這個超巨型道具在廣告拍攝後便拆了。
想重溫這6集經典廉政廣告短片，由即日至7月23日，逢星期三及星期日會在九巴「路訊通」播放，另外，在廉政公署的網頁內亦有得睇。
廉政公署網址：