睇嚟批股之風真係尚未玩完，連帶半冷股嘉域集團（186）都可以在１個月內連續批兩次股，重唔係細細粒，而係講親都過億銀嗰種，幕後玩家果然厲害。
嘉域大股東上個月減持1300萬股，套現1.14億元，據講當時配售價介乎8.70元至9.10元之間，大股東收完錢，噚日又輪到公司批股，集資金額更多，配股價亦較高。據講批成40球貨，以配售價每股9.60元計，集資額高達3.84億元。
經紀黃話，嘉域上次批完股之後，股價一度抽上去11元水平，收尾股價回落，但都頂住喺10元樓上。今次批股由於係新股，所以冇咁快沽得，據講有關人等會有良好售後服務，等要咗貨嘅芬佬可以有交代。
另外，日前華豐環保紡織（364）大股東，以0.633元減持3880萬股舊股，賣畀金手指，但噚日股價竟然冇大升，金手指效應未見發揮，確係令小初覺得出奇。經紀陳話，由於隻股近日升得急，要等多一陣讓獲利貨消化，就會再開車。
慕容小初