香港足球代表隊對利物浦表面上是一場強弱懸殊的比賽，但俗語話「將勤補拙」，港隊連日來除咗俾「魔鬼教練」黎新祥喺烈日當空下狂谷體能外，最近足總更同CaliforniaFitness合作，希望透過專業健身鍛煉，短時間內提升球員狀態，7.27大球場迎「紅軍」。 文：李勇明 圖：張家俊
究竟強化後的丘建威可唔可以「Mark」死奧雲仔？狂玩划艇機的鍾皓賢又擋唔擋到謝拉特的勁射？練引體上升的歐偉倫，同希比亞爭頭槌又邊個會贏？今期《健身Guide》率先為大家直擊港隊秘密練兵情況。負責今次健身計劃嘅導師AlanNg，本身係運動員出身（九十年代初為香港欖球隊代表），所以特別熟悉運動與健身兩分面配合，他說：「由於每個人嘅體質有別，我們將為球員分為前鋒、中場、後衞、守門員四個組別，依照各位置嘅工作性質，去設計一套獨特訓練畀球員。」
後衞負責防務工作，所以增強下盤力量，與對手爭位時就有明顯優勢，以司徒文俊等壓陣的港隊後防，主要進行單腳弓字步（LungeWithoneLeg）及背人深蹲來強化下盤力量，同時對身軀平衡亦大有幫助。守門員就玩多啲划艇機，鍛煉爆發力好有益處。
中場球員上上落落，耐力和速度都好重要，以李健和為首嘅一條中場線，在健身鍛煉中進行大量的啞鈴飛鳥（DumbbellFly）同啞鈴推舉（ShoulderPress）及前臂屈伸（HammerCurl），來增強上身及手部的力量。Alan解釋由於跑步速度同擺手力量成正比，足球員的腳力一般毋庸置疑，但雙手的力量就往往被忽略。
以歐偉倫掛帥嘅前鋒組，集中進行引體上升、深蹲等增強力量的訓練。Alan指出由於前鋒職責係入球，速度和爆炸力非常重要，所以要強化雙腿的力量，槓鈴深蹲（BarbellSquat）當然唔少得。另外，「頂頭槌」亦是爭取入球的重要一環，故跳躍能力對前鋒相樣重要，由於跳躍需要強勁的臂力帶動身體，所以Alan特別安排一眾前鋒做引體上升和槓鈴上提（BarbellUp-rightRow）鍛煉臂力。
