李天秀想鬥贏碧咸？唔係講笑，呢位南韓新紮師兄，來季決定喺髮型上同碧咸爭一日之長短！得唔得呢？
獲得西甲聯亞軍皇家蘇斯達青睞，並於日內正式轉投該會嘅南韓國腳李天秀，認為要盡快適應新球會同新地方，最好係畀人一個深刻嘅印象。李天秀一向都鍾意轉換新髮型，即係成日將個頭搞到鬼五馬六，今次重講明來季有一個全新形象，叫大家要落足眼力㖭！
畀着我，能夠有呢個機會去歐洲踢波，重可以喺歐冠盃競逐，幾大都練好啲波增強實力爭正選位啦！李天秀咁搞或者博到見報率，不過無正選你踢嘅話乜都假啦，何況你個樣「靚仔」過碧咸咁多，搞咩髮型都嘥氣啦！
噚日我求大俠至講過好多英超官方網最近亂晒龍，估唔到哥倫比亞足總官方網重誇張，俾黑客入侵，無啦啦發放咗個華達拉馬取代麥杜拉拿，做國家隊教練嘅消息，搞到哥國足總要急急出嚟澄清係流料，所以話響網站睇到幾堅料都好，都唔好盡信。
足壇「菜燶華」加斯居尼講得出做得到，膽粗粗打電話比紐卡素領隊卜比笠臣，希望返母會收山。不過老笠臣始終係老江湖，好直接咁對「加薩」講，佢同隊波年輕化嘅方針唔夾，寧願坦白都唔想「加薩」空歡喜。佢講出事實之餘，又無傷害對方，夠得體。
無打工仔想俾老闆炒魷魚，有乜「𠵱郁」寧願自己炒老細魷魚攞番個彩！西班牙名教練阿拉干尼斯就慘嘞，上季同球會馬體會高層不咬弦，季中講明季後離隊唔教！後來可能見老闆（主席）基爾走咗人，佢就回心轉意決定留低。點不知𠵱家輪到新老闆施里蘇出信炒佢魷魚喎，都算冇陰功囉！
當年喺水晶宮威過一陣嘅前鋒岩士唐，轉咗會去熱刺之後就開始走下坡。後來降格去保頓更連後備都爭唔到㖭！最近佢又轉會，呢次重衰到要落去乙組球會域斯咸。就咁睇佢似乎真係撈唔掂，不過呢個時勢都重有班落，叫做好過嗰班球員失業大軍，樂觀去睇算唔錯㗎嘞！