如果你係音響發燒友，相信一定知道MarkLevinson呢個名字；因為創業者Madrigal致力於頂級音響嘅研製，令每件由佢哋出品嘅音響器材，皆稱得上係一件藝術品。而由MarkLevinson專誠為凌志LS430設計嘅音響系統，不但能營造出音樂立體有質、分析力高強之外，而且音場定位準確，尤如置身劇院欣賞樂曲表現一樣，可予人有一試難忘嘅感覺㗎！但呢套音響系統係專為LS430設計，其他車款係唔用得㗎！
另外，凌志LS430所配用嘅高智能空氣調節系統，亦係佢嘅過人之處，車廂內合共設有16個前後冷氣出風口，系統內嘅感應器，能夠根據車廂內外不同溫度、陽光強弱等資料，自動調節車廂內嘅溫度，從而給予乘客有更舒適乘車環境。重有就係全球首創左右獨立搖擺冷氣出風口，當系統探測到前座乘客席有人坐的話，電腦就會自動將出風口搖擺角度轉至乘客一方；而內置自動空氣循環系統，喺探測到車外空氣含過量有害氣體時，便會自動將車內之空氣循環，以防止有害氣體進入車廂，從而可見LS430一套空調系統係幾咁先進呢！