有一個出名嘅風水師同城中某富豪有啲交情，風水師同富豪講，話佢個女友福氣唔係好夠，未必可以同富豪好長久，所以提議話幫富豪女友搵師傅誦經，以增加佢嘅福份，富豪覺得呢個提議都唔錯，叫風水師照佢嘅意思做。事前風水師同富豪講好咗所需要嘅費用大概幾多，富豪當時話冇問題。
風水師喺內地搵咗成過百個和尚，日夜輪班誦經，足足誦咗十四日經，件事辦妥之後，風水師返到香港，同富豪攞錢，但富豪竟然唔肯畀，所以風水師為咗呢件事，好嬲富豪。
呢件事傳咗出去之後，就成為咗上流社會茶餘飯後話題，因為係人都知富豪大把身家，冇人諗得到佢連呢啲錢都唔肯畀。
鄭裕玲（嘟嘟）早前去咗新加坡七個禮拜拍劇集《Oh!CarolII》，嗰段時間啱啱係沙士高峯期，佢喺當地連修甲、洗頭都要量體溫。
嘟嘟姐話同男友呂方呢七個禮拜都冇見面，原因係男友要籌備新唱片，不過就不時有通長途電話，其實佢兩個畀人嘅感覺都好老夫老妻㗎喇！
阿姐汪明荃噚日喺觀塘為紅館演唱綵排，嘉賓鄭少秋都有嚟到。秋官一見阿姐即刻攬住佢慰問，秋官重喺阿姐面前講鹹濕笑話，但係阿姐就聽極都聽唔明，不過當馮仁昭問秋官同阿姐咁親熱，怕唔怕老婆呷醋時，秋官就得戚話係老婆叫佢咁做嘅，而阿姐就笑住話同秋官相逢恨晚。
而一向都關心政治嘅阿姐就坦言「7.1大遊行」正可反映董建華政府嘅後知後覺。
謝霆鋒復出之後聲勢明顯唔及之前，最近佢推出咗寫真集《REBORN》，唱片公司嘅新聞稿話佢呢本寫真集喺中、港、台加埋嘅銷售衝破咗五十萬大關，馮仁昭聽到呢個數字都嚇咗一跳，因為𠵱家香港同台灣巿道都咁差，平日香港嘅寫真集賣到兩三萬都已經開香檳，如果霆鋒嘅寫真真係咁好賣，咁就恭喜佢咯。
憑《臥虎藏龍》成為國際知名影星嘅章子怡，最近獲可口可樂公司邀請，擔任內地嘅代言人，佢噚日喺北京嘅記者會入面，真係好識做，賣口乖向傳媒分享自己同可口可樂結緣嘅經過，佢話：「我細個喺舞蹈學校嗰陣，每日最大嘅願望就係可以喺放學後，飲一樽冰凍嘅可口可樂。嗰份感覺真係好誘惑我。𠵱家有機會做代言人，真係令我好興奮！」
陳小春搵咗陶喆監製佢首廣東歌《啼笑姻緣》，陶喆更親自嚟香港監場。陶喆好鬼嚴，喺小春入錄音室後，嚴禁佢食煙飲凍飲。雖然監製咁嚴，但有機會同大師合作，小春都好興奮，覺得畢生難忘。另外，前晚小春喺佢屋企搞咗個BBQ派對慶祝自己生日，問佢有冇女性朋友參加？佢就好得戚話：「清一色男仔，唔使女仔都咁開心！」
