香港經濟疲弱不振，加埋嗰件老懵董，人人都睇唔到乜好前景，重叫人本地消乜嘢費。好灰！上星期iSight到貨，好多Mac友都去搶了一支，見到這個情況，重灰！皆因自己冇錢買。
文：蘋果布丁（
當日WWDCKeynote一舉行，好多人都被呢支「大支嘢」震懾，當然唔係被佢嘅功能嚇親咁簡單，而係被佢嘅價錢嚇親。重好記得對面同事走過來八卦，剛讚完幾正之後，一問價錢就回了一句「儍㗎？」，畀佢一講，我都有啲懷疑。
無疑，從性能、設計、軟件支援，以至同級產品比較，iSight真係贏晒嗰隻。但係叫我用$1,200去買一部WebCam，問心，買唔落手。唔係話佢唔值，其實我好好好好好想買，但係千二蚊喎，之前有隻FireWireWebCam賣九百蚊，有幾多人買？但係千二蚊就有人撲去搶，唔係證明Mac友有錢啲，而係證明iSight的吸引力真係好大。
上星期Mac友聚會，忽然出現一支「拉西」（神犬？），真係姣婆遇着脂粉客，成班人撲埋去趁。摸過玩過，其實真係好正，拎喺手感覺實淨，又好鬼死靚，夾響部PBG4上面都顯得幾大支嘢；配埋iChatAV效果一流，喺部667DVI上雖然未能完全做到完美FullFrame，但已經屬於流暢級數；收音能力未試到，淨係好肯定iChatAV玩AudioChat係非常之正，待我都搵到支嚟試時再作報道。