將軍澳維景灣畔賣得唔錯，不時都有買家買兩個單位，打通做巨無霸相連單位，但蘭西聽講，最近有買家，用三百二十萬買兩個一房單位嚟打通，面積只係得千一呎，只係比該樓盤最大面積單位多些少。呢個相連單位係十五座五百五十五呎嘅B室，同埋五百四十六呎嘅C室。
單位打通後，再將其中一個廚房改做房間，都係得三個房，點解買家唔買個三房單位呢？美聯物業營業董事李志成分析，可能係因為景觀嘅問題，重有一個原因，係相連單位客廳會變得好大，夠晒氣勢。
另外，李志成透露，十二座嘅E同F室，都有買家買嚟打通，面積即時變成一千四百幾呎，但價錢就要成四百八十萬。
中原地產同城市大學合作，用主要二手屋苑成交價，編製而成嘅中原城市領先指數，好能反映樓市走勢，所以不少證券行同銀行，都會參考指數走勢。但原來呢個指數都有死穴嘅，就係有時市場會出現一啲不合理嘅偏高或者偏低成交，特別係出現喺重磅藍籌屋苑，就會令到指數唔能夠真實反映市況。
出現唔合理嘅偏高價，其中一個原因係因為單位附連靚裝修，買家肯畀多啲；另一個就係買家認為單位風水好，唔介意畀多啲，以買得心頭好。呢啲因素係指數冇辦法計算嘅。
同一道理，市場偏低價成交，就係裝修殘單位，同埋凶宅。
當然，呢類偏高造價好少出現，所以對指數嘅長期走勢唔會構成影響。
前排講本港傳媒忙於應付本地樓盤，無時間北上，但大人物當然要北上找機會。蘭西收到中新社發稿，原來新鴻基地產主席郭炳湘噚日在上海，會見上海市委書記陳良宇。
陳書記講到二○一○年上海世博也需要新地支持，簡直係一頂高帽送畀大郭。中港簽訂更緊密經貿安排後，發展商似乎想加快內地投資，長實老趙先前講咗嘢，新地直情上去傾偈㖭。
香港置業區域營業董事姚偉南話，佢哋做長實嘅荃灣朗逸峯，由樓盤開賣到𠵱家，共二十日，已經做到四百幾萬蚊佣金，平均每日有二十萬進帳，對於喺荃灣區冇分行嘅港置嚟講，成績算唔錯。
姚偉南講，公司除咗派人去荃灣工廠區派單張外，重搵人打電話畀區內嘅廠家同投資客，游說呢班客入市。
既然有好成績，今晚擺慶功宴，請主區同事食番餐。
上個月開賣嘅新盤，主要係長和系嘅青衣藍澄灣同朗逸峯，藍澄灣一個月賣成千伙，代理嘅佣金自然襟計啦；原來朗逸峯都唔少嘢㗎，若果以港置市場佔有率係一成八計，發展商要畀嘅佣金總數，應該係二千二百幾萬蚊。
蘭西
電郵地址：
