日本暑期檔電影最近逐一登場，其中《大逃殺２鎮魂歌》同埋《去吧！麵包超人寶石的願望》，都係票房勁收嘅大熱門，但係我羅拉就睇好喺今個星期三上映、由Ｖ６ComingCentury三位成員初次主演嘅電影《CosmicRescue》。
呢套《CosmicRescue》嘅橋段都幾創新，故事係講人類喺2056年嘅生活，三個原本只係負責喺太空執垃圾嘅三宅健、森田剛同岡田准一，有一日自發性咁去救人時，竟然唔小心洗咗政府嘅重大機密文件，之後搞到好鬼大件事！相信無論係宇宙片迷，定係ComingCentury嘅fans都會捧場。
呢套戲唔知會唔會喺香港上映，所以好恨睇ComingCentury嘅迷哥迷姐，不妨睇吓呢套戲嘅making書《ComingCentury宇宙航海記錄》。呢本書追訪三位主角由開拍到煞科每一日嘅流程，包括岡田受傷、三子喺假太空食意粉等。至於令我羅拉最驚喜嘅，莫過於嗰本仿美國袋裝漫畫嘅雜誌，分分鐘重好睇過套戲㗎！
此外，靜香前日為佢有份配音嘅《麵包超人》宣傳嗰陣，亦有提到兩個囡囡嘅生活，佢話二女光希太細，唔會喺卡通入面認出媽咪把聲，反而兩歲大嘅大女心美就認得出，心美重好百厭咁成日攞住媽咪嘅高踭鞋嚟着，話要變成靜香聲演嘅角色呢！