球員轉會消息自然成為歐洲球壇係暑假嘅「主打」項目，傳言滿天飛，好似日前全個英國都報道韋拉已經續約阿仙奴，點知原來未簽約，真係變幻莫測。
韋拉就透過阿仙奴官方網頁，表示續約一事仍然同球會傾緊，進展良好，但絕對未答應簽紙，繼續效力「兵工廠」。呢位法國球星重話，如果決定咗自己前途後，一定會喺阿仙奴官方網頁公布同交代一切，咁球迷就唔使因為其他傳言估吓估吓。
我求大俠的確明白，球會官方網站所發表嘅消息或者聲明至係最後結果，但有唔少英超聯球會嘅官方網站，好似曼城、熱刺同列斯咁，唔知係咪因為職員放暑假，網站慢到離晒譜，睇到谷鬼氣！
熱刺嘅舒寧咸去咗樸茨茅夫後，佢件十號波衫由邊個繼承呢？答案係羅比堅尼。熟悉熱刺嘅球迷一定知道，十號衫喺熱刺確係有啲神聖感覺，好似以前荷杜同連尼加等一代名將都着過，之但係羅比堅尼又後生又好波，隨時下年會離隊咁款，所以呢件衫真係未必綁得住佢。
禮拜日亞洲盤只係開咗一場國際賽，由美國迎戰巴拉圭，本報名家吾中貼上盤即中，而原來同日重有一場冇開盤嘅墨西哥對薩爾瓦多，結果墨國派後備兵上陣輸一比二，我求大俠就話，大家都係備戰金盃賽，美國人一樣勇往直前，尤其喺主場確係特別有計。
上海申花日前擊敗青島貝萊特，重登中國甲A聯賽榜首，但係教練吳金貴賽後講，賽前有人打電話畀佢，希望佢能夠「合作」；賽後又語帶相關同啲球員講：比賽輸咗可以下場贏番，但失去人格，就係一世，似乎懷疑緊啲球員。我求大俠對消息半信半疑，始終要有證據先得。
些路迪季前去咗瑞典踢練習賽贏業餘球隊七比○一仗，但係拿臣就無士哥，搞到成班鄉里失望至極。我求大俠一向頗欣賞呢位球星，尤其斷腳之後都踢得咁出色，季前熱身賽冇表現唔緊要，最緊要係正式比賽時「士哥」不斷，我對佢有信心！