陳敏之是家中長女，自從父親早前患癌病逝後，便肩負孭起整頭家的重任。回憶起童年與父親生活的點滴，陳敏之表示父親最愛跟她合照，但幼時她愛耍小姐脾氣，要爹哋陪她一起玩貓咪公仔，才肯陪父親拍照。
陳敏之的父親早前被癌魔奪去生命，令家人十分傷心。陳敏之表示父親十分疼愛她，小時候常帶她出外玩耍，她日前說：「爹哋好錫我，佢教識我做好多運動，好似游水、踩單車同打乒乓波，又教我寫書法。」
陳敏之翻看跟亡父的合照時，種種快樂回憶頓時湧上心頭，她說：「我記得有一張相係爹哋抱住我坐喺沙發，我細個影相都幾講心情，如果心情唔靚，邊個叫我影相都冇面畀。嗰次我咁啱喺沙發玩緊一隻毛毛貓玩具公仔，爹哋叫我影相，我要佢陪我一齊玩公仔先肯就範，結果咪有相為證囉！」
陳敏之大讚父親後生時英俊有型，又是模範父親。她說：「爹哋高䠷有型，成個模特兒咁款。」
陳敏之續說：「爹哋從來唔會鬧我哋，而媽咪就喺屋企飾演惡人角色，我同細佬一做錯，媽咪就會好惡咁鬧我哋。記得小學默書唔及格，媽咪鬧咗我一大餐，重罰我喺地下抄書，之後我就開始好勤力。」
此外，陳敏之亦難忘十一歲時一家四口到歐洲旅行，陳敏之說：「嗰時去歐洲嘅團費好貴，但爹哋就帶晒我哋全家人去玩，我哋重喺巴黎鐵塔前影相，嗰時覺得好威水。」
採訪：比華利
