早排以人氣偶像Shine作代言人嘅WeWa!!MP3機，短時間內再接再厲，推出兩款新型號，除外形同功能有別，重內置256MB記憶體，收錄歌曲達64首，真係由西環搭電車去到筲箕灣來回都聽唔晒，最正係賣價$1,180，加埋收音機功能，比同級機更加抵玩。
記者、攝影：徐影龍 ImageGirl：Kelly
第一款型號為WMP-317Plus嘅WeWa!!MP3機，代號為Dolphin，雖然機身設計未致成條海豚咁趣致，不過全機亦採用十分流線型嘅渾圓設計，握上手感覺唔錯，加上極其輕巧，掛上頸都唔覺重。金屬面板及銀色機身，令WMP-317Plus賣相增添一點夏日Cool味，可惜係跟海豚更為貼切嘅藍機版本，要到七月中先有貨，有興趣嘅用家要留意。藍光屏幕已屬WeWa!!指定動作，黑暗環境底下份外型過人，其特大屏幕方便顯示多樣化資訊，如時間、播放模式、電源、歌名等，MP3機狀態夠晒一目了然。順帶一提，WMP-317Plus支援中文及英名歌名，不過就唔支援日、韓等文字顯示。
WMP-317Plus同時支援MP3及WMA檔案格式，透過256MB特大容量，可收藏64首標準壓縮歌曲，又或作緊急外置式儲存裝置咁用都得，USB免Driver一插即讀，去到邊都用到。256MB記憶體更可一口氣錄低長達20小時聲音，開會做備忘就至啱。雖不設任何線控耳筒，不過就一口氣附送兩個耳筒，一個為簡單輕便型，冇任何附加功能，勝在輕巧方便。而另一款耳筒體積稍大及重，不過就設有收音機功能，可接收FM頻道，聽MP3外重可選擇聽電台節目。兩款耳筒各有所長，揀咩耳筒帶出街都可靈活選擇。
至於另一款WeWa!!WMP-313zPlus，則屬舊型號WMP-313Pluz嘅更新版，外形上冇任何改變，不過新加銀及炭灰兩色機殼，內置記憶體更由128MB倍升至256MB，賣價跟海豚WeWa!!一樣為$1,180，市面好多同級機得128MB都賣過千蚊，換句話講，其實即係廠方將WMP-313zPlus加RAM不過冇加錢。功能方面亦同海豚WeWa!!差不多，藍光屏幕支援中英文顯示、20小時錄音、USB直接抄寫等，跟機耳筒亦同樣為外置式FM收音機版本，聽聽吓歌轉聽新聞都得。
WeWa!!嘅香港代理恒昌電子，特登預留80條超靚WeWa!!頸繩畀《蘋果》讀者，呢條透明膠包金屬嘅頸繩，賣相一流，本身只作推廣之用，買機都冇得送，相當珍貴。另外重有70張「WeWa!!×Shine」大海報送畀讀者。只需手持今日本報紙版，到銅鑼灣皇室堡12樓1211室LongrandShowroom，就可免費換領一條WeWa!!頸繩或海報，兩者數量相當有限，送完即止。如即場買WeWa!!，重可獲得兩張Sammi同古仔暑假大片《戀上你的床》戲票或海報，詳情可向恒昌電子查詢。
恒昌電子查詢電話：21111572
網址：