前晚凌晨得知港府押後23條立法，趙飛雲開心到瞓唔着，只係瞓咗三、四粒鐘，但噚日起身仍然覺得神清氣朗，街上所見唔少人都好似趙飛雲咁，有少少熊貓眼但笑口盈盈。
董建華今次真係輸得慘，直情係一鋪清袋。明明有條下台階畀佢，但居然蠢到拆咗，結果撻到直一直，再難翻身。
七九大炸彈剛拆除，好友已急不及待大挾淡倉，在期指帶動下，恒指午市升勢似火箭，大升255點，收9892，期指方面更誇張，收9995，高水103點，幾乎令人以為董建華宣布下台。
趙飛雲早前提過要兩手準備，以一對恒指輪9785及9789炒上落，由於形勢有變，噚日變身做好友，早市在0.194元買入50萬份恒指Call輪9785，尾市在0.25元沽出獲利，真係好耐未試過咁大豐收。
港股噚日大升純粹係挾倉效應，但以勢論勢，恒指以大陽燭升穿20日線（現處9745），下一個目標將再試上次高位10067。不過噚日期指大高水103點，成交逾3.2萬張，認輸離場的淡友十分多，可能挾無可挾，估計今日高開後，大戶反手殺好倉的機會唔細。
除非董建華真係下台，為香港帶來新希望，否則港股只是上落市，短期策略仍是揸住一對恒指輪炒上落。港股噚日大升255點，恒指5分鐘圖、15分鐘圖已經大超買，今日高追唔值博，但日線圖轉弱為強，宜候恒指回頭考驗20日線支持不破，再追入恒指Call輪9785。
趙飛雲