無官一身輕嘅鄺其志，噚日喺港台首次開咪，節目有一個時段佢做評論員，自然離不開23條。噚日佢又順手錄定下個禮拜嘅播歌環節，揀咗梁漢文嘅《重新做人》，唔知係咪點畀佢舊老細老董聽呢？
佢又點咗劉德華嘅新歌《如果有一天》，似寓意佢𠵱家嘅心境；佢話有啲人一生營營役役，追求金錢、權力同名利，有風駛盡𢃇（講緊某司長或局長？）；有啲人逆境時怨天尤人，不肯面對現實，因此佢結論係做人唔應該咁執着，無論順境或逆境都應以平常心看待，拎得起放得低，最緊要「食得落睡得好。」
錄完音，鄺神童同八方坐低傾咗一陣，佢心情十分靚成日笑笑口，話早排去旅行，外國入境人員問佢做邊行，佢答得好爽咁話「retired」（退休人士）；五十二歲就退休都幾令人羨慕，但就未夠期攞埋長俸。八方話好似曾蔭權咁有長俸又有問責局長人工收，都幾過癮，點知鄺神童話：「你問吓佢開唔開心？」
鄺神童目前雖然無正職，但上星期六錢果豐做主席嘅中華網就委任咗佢做獨立非執行董事，算係半份兼職，閒時可以游水，陪老婆唱歌跳舞，不知幾優游。不過八方覺得，以鄺神童嘅資歷，咁快做退休人士好似嘥咗啲。
傳真︰2623-9278
電郵︰