沙士疫情已經告一段落，香港旅遊發展局為咗盡快搞番好香港旅遊業，馮仁昭聽聞佢哋諗住搵成龍幫手拉客，趁佢部新片《飛龍再生》（Highbinders）下月初喺香港搞首映，乘機叫成龍搵埋世界各地嘅fans組團嚟香港捧場，借勢宣傳同推廣香港旅遊事業。到時班fans除咗可以睇首映外，有關方面重會借出赤鱲角機場嘅停機坪同班fans開大型派對，都算係別開生面。
不過，早幾日馮仁昭打電話問旅遊發展局呢單嘢嘅時候，嗰位發言人唔單止乜都nocomment（不予置評），而且態度重差到冇人有，就算時機未成熟唔可以透露，態度都可以客氣啲啫！連對自己人嘅態度都唔好，又點樣有耐性咁對待外地遊客，宣傳香港呀？唔通嗰位小姐冇睇過佢哋搵劉德華拍嗰條宣傳片「今時今日咁嘅服務態度係唔得㗎」？
張可頤噚日去咗大埔嘅許願樹為無綫新劇《金牌冰人》祈福，見佢大熱天時重着住件古裝衫出席都幾辛苦㗎，不過祈福後就收到贊助商送出嘅金杯一對，可頤好開心咁話之前已經收過一對金杯同金扇，佢將對杯轉送咗畀佢細妹做結婚賀禮，佢話𠵱家收埋咁多金，屋企就嚟變咗間金屋喎！
林敏俐噚日喺將軍澳電視廣播城錄影無綫新節目《趣味英語坊》，佢喺節目裏面會教一分鐘英語。林敏俐細細個就成家移民美國，講英文當然難唔到佢，大家唔好睇小只係每日出鏡一分鐘，好似利嘉兒喺《笑談普通話》節目裏面教普通話就教到上晒位，唔知林敏俐會唔會咁好彩呢！
葉世榮噚日喺元朗拍攝悼念已故女友歌曲《珍惜》嘅MV，對於Beyond前經理人陳健添早前推出八七年Beyond喺高山劇場開騷嘅DVD，世榮話：「佢直情係食住上，一般生意人嘅諗法。家駒會知呢件事，家駒會整佢㗎，或者會報夢提醒佢。」至於怕唔怕有唔出得街嘅片段，佢就話驚唔嚟。
譚小環同曹永廉，前晚喺大埔拍攝電影《寬頻聊齋》。小環喺戲中飾演女鬼，佢話一定要同導演攞利是。小環話：「我第一次做女鬼，感覺好新鮮，但亦好驚。我已經袋咗塊玉同埋符喺銀包。」小環重話以前喺美國登台嗰陣，聽到房入面有鎖鏈聲，嚇到佢即刻搬去保母間房瞓。
陶大宇同周海媚（海味）噚日去浸會醫院為劇集《亞洲英雄》拍攝醫院戲份，飾演醫生嘅海味就以全套防禦服裝上陣，咁啱噚日嘅天氣非常酷熱，海味都大歎好焗熱。而陶大宇近日返無綫將軍澳電視廣播城時，發現嗰度好容易蕩失路，而且重有好多規矩，所以佢話要慢慢適應。
