某位天才高官，唔知點諗嘢，無端端在7月1日大遊行前爆出一句話市民大規模遊行會影響香港國際形象。並不深究此句話的內容啱定唔啱，只係唔明喺咁嘅時候講句咁嘅嘢究竟係乜嘢意思？不過，既然大家都熱切追求民主及言論自由，邊個鍾意講乜嘢確然係自己鍾意，不過邊個有幾多料就市民心中有數。
若果講到香港在國際上的形象，除咗需要特區政府用啱方法、使啱錢、聰明地在國外大力宣傳之外，香港本地都有好多嘢要做。遊客嚟香港，普遍第一印象嚟自市民，今時今日香港人大概已知道旅遊業對香港的重要性，應該識得自動自覺有禮貌。遊客嚟嘅重點節目係購物，謀人寺商店應被大刀闊斧斬除；售貨員方面，基本上已比以前殷勤，這可要多得劉德華先生的金句。唔好嫌我煩，再鄭重地講一次，唔該搞好啲公廁。遊客嚟到香港，就算其他嘢點樣做足一百分，只要去公廁方一個便，當堂變成倒扣一百分。廁所絕不止是衞生問題，簡直係與文明掛鈎，例如位於中上環舊街市附近的公廁，一個街口外已聞到強力嘅阿摩尼亞，入到裏面，氣味更似成為固體，猛力襲擊呼吸系統，只要死咗唔超過三日，暈咗唔超過十日，入去索一索，應該都醒得番。
各位高官若然坐在冷氣房諗唔掂點樣處置23條，不妨考慮去上述公廁內開會，擔保好嘅醜嘅都幾分鐘內就散會，絕唔會再議而不決，決而不行。