23條立法變化峯迴路轉，最後由田少呈辭，迫使阿董撤回二讀。
市場人士在上午有少少憂慮港府管治危機而不敢冒進，但午後市場終於將事件理解為本港避過七九政治危機，屬利好因素，加上市傳阿董會宣布辭職，以及投資者預期美股造好，因而觸發補倉潮，港股全日收報9892，升255點，成交97.89億元，即月期指更大幅高水103點。不過，阿虎認為最大嘅利好消息，係中央在呢件事上表現克制，未有作出高姿態的干預。
阿董統治班子散咗，但特首家族隻東方海外（316）重未大散，股價逆市跌1.67%，收報11.80元，成交446萬元。隻股近期成交已見萎縮，似乎再冇游資入市捧場。
萬順昌（1001）大股東以每股1.25元配售3120萬股，消息導致股價一度急挫9.6%至1.38元，但其後被托回至1.49元水平收市，跌幅收窄至2.6%。黑客話，據聞呢手貨落入強者手中，準備炒上，噚日只係借勢震吓倉，希望藉此收集更多平貨，後市走勢不宜睇得太淡。
廖銀（1111）又傳出賣盤，作價15至18元之間，炒高11%，收10.50元。另一隻長期放盤的港基國際（636）成交亦轉趨活躍，達3736萬元，但股價表現一般，升1.7%，報2.95元。Cookie話，港基現價唔吸引，反而廖銀更值博，不過廖銀賣盤之說，據講仍係十畫未有一撇。
阿虎