條風波路轉峯迴，港股反應大好，恒指大升255點，收9892，期指高水103點，睇嚟一萬點冇乜走雞。
滙豐（005）收94元，升1.5元，升幅細過大市。人心定番，啲錢流落大隻藍籌，滙豐會成為吸納對象之一，不過滙豐始終係大笨象，升幅未必及得住其他藍籌，但係啲Call輪因為有大槓桿率，所以彈跳力亦較強。滙豐Call輪正路對象係9632，9月到期，現價58仙，負溢價0.2%，槓桿率16.2倍。已經冇晒溢價，以後變化，跟正股跟到貼一貼，正股閒閒哋再升3元，唔算多，但隻輪就升30仙，計落百分率超過50%，好勁爆。
市場買貨力量釋放出嚟，窒步咗好耐嘅地產股，跑贏指數，恒地（012）升6%，新地（016）升5.3%。長實（001）升得較慢，只有1.9%進帳。
博長實跟番大隊，買Call輪。論爆炸力，仍然係9764，9月夠鐘，現價22仙，溢價7.1%，槓桿率21.7倍，昨日一升就係32%。搵抵食對象，則始終係9829，11月到期，現價51仙，昨日只升得5仙，未夠，溢價4.8%，槓桿率9.4倍。呢個槓桿倍數其實都唔細。
長實有機會升番上51元，9829可上試0.80元，有差不多6成水位。
章盛