由今日開始，想飽覽維港景色，可以坐一艘用咗五百萬元粉飾、名為輝星號嘅天星小輪，日間單程環遊票最低消費三十蚊，由尖沙嘴天星碼頭出發，途經紅磡碼頭，喺鯉魚門橫過維港；然後經灣仔碼頭、中環天星碼頭，再喺西環對開海面返尖沙嘴，全程一小時。
維港夜色特別靚，所以要收貴啲，每位八十蚊，包一杯飲品一件餅食。天星小輪董事易志明話，香港嘅海港咁靚，一早就應該搞呢類海上遊，但係有心唔怕遲，沙士已經暫過，啲遊客陸續返緊嚟，應該掂嘅。今日首航禮，除咗周梁淑怡同鄭汝樺會嚟，重有藝人梁詠琪，肯定好熱鬧，八方噚日先遊為快，亦一樂也。
（圖）天星小輪董事易志明話維港景色咁靚，海上遊實掂。
傳真︰2623-9278
電郵︰