楊千嬅、鄭中基這對緋聞情侶昨日和梁漢文、何韻詩一起拍啤酒廣告，鄭中基主動行近千嬅身邊合照，千嬅顯得不太願意，鄭中基表示因為想賺錢買樓，所以不介意和千嬅情侶檔拍廣告，莫非他想和千嬅一齊住？
楊千嬅、鄭中基、梁漢文和何韻詩昨日在九龍城舊啟德機場拍攝百威啤酒廣告，四人還合唱一曲《火紅火熱》，千嬅和鄭中基這對緋聞情侶成為全場焦點，當四人影大合照時，梁漢文和何韻詩夾在兩人中間，之後記者要求兩人合照，千嬅顯得不太願意，之後鄭中基主動行過去，千嬅才和他一起合照。
記者要求千嬅和鄭中基合照時，千嬅說：「又影？影咗好多年嘞喎！我同佢拍過《行運超人》，但合唱同拍廣告就係第一次。我哋不嬲多機會合作，呢個圈興mix&match吖嘛。」問千嬅可介意和鄭中基單獨拍廣告，她說：「睇性質啦，情侶檔就冇謂嘞，做青少年大使就冇所謂。」
千嬅又說：「我今日好攰，因為之前去咗內地做一連串《新紮師妹２》嘅宣傳，回程時車好震，導演馬偉豪震到跳起，重撞到個頭，所以我唔敢瞓，凌晨三、四點喺架車度鋤Ｄ，冇瞓過就嚟拍廣告。」
而鄭中基上周五因拍攝《龍咁威》時被對手踢到，令左手甩骹，即時送去醫院，下星期更要接受物理治療，預計一至兩個月才能完全康復。鄭中基說：「千嬅今日先知，佢問我做乜，我初時重講笑話係打保齡整親，不過跟住都有話畀佢知。」
問鄭中基今次和千嬅是否情侶檔演出，鄭中基說：「千祈唔好咁講，我哋係金牌四寶crossover先真。」鄭中基又稱不介意和千嬅情侶檔拍廣告，他說：「我制呀，我要搵錢，因為想買樓，屋企附近起緊新樓，我心郁郁想買，我𠵱家同屋企人住，一夜返就嘈住佢哋，我阿嫲都有黑眼圈呀。」記者問千嬅租屋的話可有預他的一份，鄭中基笑說：「如果去住都要收租㗎！」
採訪：駱華齡 攝影：仇志中
