大市噚日勁升，似乎係慶祝押後23條，總算不枉小初同一班經紀老友，在七一行到腳軟同叫到聲沙。
由於港股勁升255點，好多股仔都跟住升。經紀陳話，文化傳信（343）炒家條命生得好，次次開車都夾啱時間，好似先排發行認股權證，就有消息話文傳同意科（943）以換股方式與美國Transmeta合作，大搞Midori版本的Linux作業系統。
文傳隻輪今日掛牌，噚日正股已見異動，上升4.84%，收0.26元，成交股數急增至1.1億股，成交金額有成2850萬元。理論上今日新輪上場，炒家點都會托住個價，否則唔係咁易散到批輪。至於炒作藉口，就輪到文傳同IBM月中搞推介會。
文傳呢批輪，話就話會批畀100個以上嘅投資者，照計貨源唔應該太散，以每份輪作價0.06元，行使價每股0.165元計，有貨在手者，肯定笑到停唔到口。
至於同文傳合作無間嘅意科，經紀陳就話要等一等，未有咁快開車。
慕容小初