「依度？邊度呀？」、「哦！山度士我識，以前踢港隊，𠵱家勁鍾意揼骨沖涼嗰個吖嘛。」錯喇，錯喇，講緊嘅係喺六、七十年代好hit嘅手表名牌依度同山度士呀！呢間喺上海街有40年歷史表行，就喺貨倉搵番一批六、七十年代嘅名表出嚟賣，包括有依波路、山度士、伊度等名牌貨，全部懷舊絕版，價錢重回到過去同六十年代一樣，幾百蚊就買到隻名表。
記者：馬慶武 攝影：黃子偉
Model：Ever（SunSpot）
髮型及化妝：Cathy（BeautyTech） 服裝提供：滿清皇朝
喺亨得利打咗三十幾年工嘅麥小姐話，70年代時，舖頭由中環搬咗嚟上海街，老闆因為專注地產生意，所以無時間打理表倉，有時入咗啲貨都無拎出嚟賣，好似呢批古董表，就喺倉度封塵廿幾年，𠵱家終於重見天日。
第1位
原價$9,600 懷舊價$4,800
麥小姐話呢個來自瑞士嘅牌子，喺香港已經冇代理，所以呢隻表可以說是絕無僅有。而包純銀嘅表帶以及藍色玉石製嘅表面，咁矜貴當然係今次古董表開倉之首啦。
第2位
原價$2,500 懷舊價$1,280
60年代出產嘅上鏈表，矜貴在鈪形表帶及表身上都鑲有搪瓷，而且搪瓷上嘅圖案全部均以人手繪上，十分古典優雅。
第3位
原價$1,600 懷舊價$880
包白金表帶上嘅橫紋好搶眼好細緻，而且羅頓呢間表廠已經唔存在，令呢隻60年代絕版貨更有收藏價值。
第4位
原價$980 懷舊價$480
美華呢間瑞士表廠已於早年關閉停產，而且據麥小姐講，小三針自動表款喺當時嚟講絕對係貴價表款，好少人買得起，所以出貨量一定唔多，如果唔係今次機緣巧合搵到一批存倉貨，都無乜可能再買得到。
第5位
原價$980 懷舊價$550
雖然唔係包真金，表面上嘅亦唔係真鑽石，但係全金色表身表帶，加埋表面嘅閃石，外表已經夠晒氣派。買唔起「金撈」扮HipHop黑鬼，呢隻都可以頂住當先。
第6位
原價$1,800 懷舊價$980
60年代，好多香港人連26個英文字母都未識晒，星期一至日嘅英文簡寫就更少人識睇，所以呢隻依波路自動表就以中文字顯示，呢個設計只係嗰個年代出產嘅手表先有，絕對稱得上係歷史痕迹。
第7位
原價$1,500 懷舊價$780
唔鍾意金色表咁俗氣，但係又想懷舊一下，可以考慮吓呢隻方形表面嘅山度士，表底採用透明設計，可以睇到表內機械，而且有齊男女裝，可以同男女朋友一齊懷舊。
第8位
原價$2,700 懷舊價$1,280
喺70年代初，喺表身外加一個大表框，呢個設計可謂突破又前衞，再配上伸縮嘅金屬表帶，相信當時呢款表定必是潮人之選。
第9位
原價$1,200 懷舊價$600
70年代勁流行嘅女裝皮帶斗零表，表身如斗零般大，隻手離遠啲都睇唔到時間，絕對同手表方便睇時間嘅用途背道而馳，唔明點解咁受歡迎，但係勝在夠經典。
第10位
原價$580 懷舊價$280
睇戲都睇唔少，60年代啲紳士最興就係喺西裝袋攞隻陀表出嚟睇時間。呢隻上鏈陀表重有透視設計，可以睇到表肉嘅運作。
新表照減
為咗照顧一批唔鍾意懷舊表款嘅表迷，亨得利今次減價都會有少量新貨減價益街坊，價錢雖唔及得古董表咁抵，不過都平過出面市價好多，具一定吸引力。
原價$1,260 特價$780
典型潛水表外形，具有150米防水功能，夏天暢泳必備。
原價$780 懷舊價$390
除咗鮮黃表面搶眼之外，日曆和星期分開兩邊顯示亦係特色所在。
亨得利鐘表公司（23889125）
地址：油麻地上海街358號地下
減價日期：今日至7月22日