政府在壓力下終於宣布押後二讀《國安條例草案》，演藝界不少導演如張堅庭、陳可辛、許鞍華及張同祖均表示此乃人民的勝利，張堅庭勸特首董建華最好提早退休，而鄭秀文亦首度公開表態反23條。
本月一日超過五十萬市民上街遊行，反對23條立法，政府終宣布押後二讀，不少香港導演聞訊表示歡迎。而日前鄭秀文（Sammi）接受商台訪問時，亦首次透露她對23條的看法，原來她的立場也是反對23條立法。
Sammi說：「可以冇當然最好啦！雖然我嗰日冇去遊行，但係我嗰日都喺屋企着晒黑色衫褲。我屋企立場係『你都係唔好表達咁多』，但係我覺得作為一個香港人，表達少少都唔係過份。」
雖然Sammi未有出席7.1遊行，但她在家中看到數十萬人上街的情景，除了感動外，更為她帶來一次反思的機會，Sammi說：「我有特登喺屋企搵個Viewcam拍，嘩！好犀利！啲人嗌晒咪，同埋啲人好早已經企晒喺度等，嗰個場面睇到自己有啲感動，點解啲人咁澎湃呢？佢哋為嘅係乜嘢呢？咁就會喺屋企反思吓，我以後應該點。」
對於特區政府終於向壓力低頭，押後二讀23條，導演許鞍華昨日接受電話訪問時說：「最好唔需要23條啦！既然咁多人反對，今次市民上街遊行，團結咗市民，咁大家以後應該好好搞番好香港。」
而張堅庭認為港府已出現嚴重的管治危機，他說：「今次董建華唔係聽取民意訴求肯押後二讀，只不過係自由黨鐵票流失，佢唔想出醜先被迫咁做。由7.1遊行到𠵱家，董建華嘅表現係零分，其實董建華都六十幾歲人，心力交瘁，做特首咁大壓力，佢不如提早退休，安享晚年好過，佢嘅性格製造咗佢今日嘅悲劇，7.9我會照去立法會睇吓，我希望可以爭取普選特首。另外，未登記做選民嘅合資格巿民，快啲登記做選民，千祈唔好再選保皇黨好似民建聯呢類議員。」
另一導演陳可辛亦對政府押後23條立法表示歡迎，他說：「政府最好多啲諮詢大眾意見，取得共識先立法，家我最信大律師公會，連佢都反對得咁27
導演羅舜泉將競選大埔區議員，他表示因為不滿政府所以參選。羅舜泉說：「我7.1特登喺內地趕返香港一家大細着黑衫去遊行。董建華立23條完全冇理民意，出爾反爾完全係無恥。唔好以為有兩條門口狗，當巿民係狼來了先得㗎！如果董建華聰明嘅，應該有幾個人要落台，包括梁錦松同葉劉淑儀，梁錦松零分，做財政司做到本末倒置。我個仔得十四歲，佢都識問我，點解學校有得選組長、班長，而香港就冇得選特首？」
此外，香港巿民連日都很留意新聞，大遊行當天無綫的六點半新聞，最高收視有二十四點，即有一百五十五萬人收看，亞視上周二六點鐘新聞最高收視點則罕有地有十七點，即一百一十萬人收看，為亞視上周收視之冠。
採訪：魯萍、陳月媚