七月七日，乃中日戰爭之序幕，七七盧溝橋事變，係六十六年前嘅事，亦即係我哋特首董建華出生之日，今日恭喜特首牛一，祝佢與時並進，「團結、信任和理解」香港人，不要辜負溫總理嘅期望。
特首生肖屬牛，相師話牛人多數守原則、硬淨、牛頸、牛脾氣，你話特首係唔係典型牛人呢？牛人今年犯太歲，請特首一切小心。特首在戰爭年份出世，到咗十二歲經歷第二個牛年，就係上海富豪匆忙逃難，走出大上海，到香港避秦，所以特首嘅最初十二年，經歷抗戰、內戰、逃難，兒童生活絕不好過。第三個牛年（一九六一）發生過乜嘢大事，左丁山唔記得，好似中國踏入飢荒年，港人要擔抬麵包返鄉下，想來特首當時出道未久，父親嘅船運生意不斷擴充，應該好快樂；第四個牛年（一九七三），恒生指數上到千七點歷史高峯，之後就跌到四腳朝天；第五個牛年（一九八五）係中英談判之後，香港經濟唔掂，到咗第六個牛年（一九九七），香港回歸中國，特首事業攀上高峯，成為香港領袖，但香港嘅黃金時期亦暫告消失，不知何年何月先至恢復元氣。
特首每逢牛年，便碰上社會憂患，民生經濟不安，真係巧合。一九三七年出生之人，正是生於憂患，可能好容易產生居安思危嘅思想，故此努力工作，不尚浮誇，注重踏實。咁嘅人物做領袖，究竟錯在邊度呢？