前日睇過加斯居尼單妄想踢紐卡素新聞之後，我求大俠歎息到差啲連個頭都擰甩埋，點知啱啱又多單前曼聯球星沙柏，因為違反咗佢效力嘅冰島球會禁酒令，俾人踢走，真係衰到貼地。
已經三十二歲嘅沙柏過去曾喺曼聯有過光輝日子，但近幾年就好似球壇流浪漢，前排終於去咗冰島效力一支蚊型球隊，點知就因為同隊友去咗飲酒，結果會方以佢嘅背傷理由，同佢分手；而佢就更加強調，自己已經對足球冇晒興趣……唉！
佢一場波可賺到六千零蚊港銀，相信係佢要離隊原因，冰島生活指數唔高，沙柏咁嘅價錢對會方係負擔；諗起碧咸喺皇馬嘅昂貴周薪，就令我求大俠要為沙柏再歎息一次。
拜仁領隊漢尼斯話，來屆多咗個碧咸嘅皇馬，比賽時就好似做馬騮戲，冇啲尊重。皇馬體育總監華丹奴回應話，上屆拜仁講皇馬多咗朗拿度入球唔會增加，重會失多啲波，但係講完之後十日，拜仁喺歐冠盃出局。事實勝於雄辯，華丹奴嘅話有力得體，拜仁都係出少句聲好。
帶領巴西參加二千年奧運，最後輸咗畀喀麥隆後被炒嘅教練盧森貝高，上周五因為被裁定喺九四至九七年間，透過中間人買地避稅，被判監五年零三個月，真係醜！不過唔知佢可唔可以學以前艾蒙度咁，坐半日監，半日番高士路教波，如果唔得，高士路就多得佢唔少囉。
前日布雷西亞響圖圖盃對住哥利亞，當布隊哥迪連尼射成一比○時，有兩個好出名嘅網站都顯示入球者係巴治奧，搞到我好愕然，計正呢位老將都應該未唞完，無理由落場㗎。後來我上網查一查，巴治奧根本無列入出場名單，唔知係咪啲網站工作者都太掛住巴治奧啦。
曾經響AC米蘭威到盡嘅阿柏天尼，已經由馬德里體育會回歸，不過佢留響米蘭嘅日子未必會長，據報話AC正度緊再將佢外借。阿柏天尼係AC老臣子，已經錯過球隊上季咁威嘅球季，𠵱家又唔知被「掟」去邊，呢個一代名將都咪話唔慘情。