爆機狂迷：
《SilentHill3》邊驚邊玩騎呢怪物嚇機迷

恐怖驚慄Game一向都有唔少捧場客，不過真正能躋身經典長賣系列嘅，始終寥寥可數，除必賣嘅《BioHazard》系列外，《SilentHill》系列亦憑住氣氛營造、古怪敵人而名列三甲位置。嚟到新一集，廠方繼續將恐怖元素發揚光大，大量黑暗環境再加入更多古怪兼騎呢嘅怪物，誓要機迷邊驚邊玩。

記者：徐影龍
逢星期一至三、五出版

遊戲類型 AVG
對應機種 PS2
遊玩人數 1人
售價 $389
開發商 Konami

今次《SilentHill3》最出色係出現大量賣相奇特嘅敵人，大部份以人形為藍本，調換手腳加加減減，極度扭曲成為怪物，造型天馬行空，打個照面已經俾佢哋嚇窒，而且全部凶神惡煞，揸住木棍又追又咬，女主角俾佢哋追到索氣，將機迷帶入一個極度虛幻嘅世界，兼滲出濃濃詭異感覺。除上集出現過嘅鬼護士、長條人，今集重加入着兔仔戲服嘅關鍵角色，本來外表可愛，頗為討人喜歡，不過套戲服又殘又污糟，重成個嘴都係血，都咪話唔嚇人。

死城彌漫詭異氣氛
能成功晉身恐怖Game經典，氣氛營造相當重要，《SilentHill3》承繼過往那種無邊黑暗，大部份時間摸黑進行，只靠身上小型電筒照明，分分鐘有隻怪物喺身邊都唔知，幸好今集保留收音機工具，每當有怪物接近時，都會按距離發出大小唔同嘅噪音，等玩家有所警覺，不過反而增加玩家心理壓力，每有聲音總會疑神疑鬼，刺激度爆晒燈。環境設計亦值得一讚，恍如死城嘅市鎮，建築物極為殘舊，鐵床鐵架全部生晒銹，周圍都有血迹，驚慄氣氛不言而喻。

一張筆記諗餐飽
環境、氣氛做得好，都要隻Game好玩先得。《SilentHill3》主要由動作及解謎兩方面組成，一開始女主角Heather已經要面對頗多怪物，除可使用木棍、刀仔反擊外，尚有手槍等可作遠距離攻擊，不過就有彈數限制，兼且對往後某類怪物無效。解謎方面，《SilentHill》一向需要較深入嘅思考，今集都唔例外，經常出現一幅塗鴉或一張筆記，需要玩家破解，雖然不時要周圍搵鎖匙開門，不過唔會太過份，唔使圍住大屋走幾十次咁麻煩。可自由設定難度，重分動作及解謎，可按自身強項選擇，如動作有信心可選Hard，解謎弱嘅可分開選Easy，算幾貼身嘅設計。

附送迷你五曲CD
Konami驚嚇你唔夠，特登跟Game附送多一隻MiniSoundTrack，一共收錄五首主題背景音樂，除好鬼正嘅主題曲《You'reNotHere》走輕快Feel外，其餘四首BGM，編曲氣氛同樣詭秘懸疑，唔打機時攞隻3"CD出嚟聽吓都唔錯。

50張海報
益讀者
又到送獎品時間，今次Konami香港代理龍勇，特別送出50張《SilentHill3》大海報畀《蘋果》讀者，只要手持今日本版，到灣仔DreamStore，就可免費換領，數量有限，送完即止。

售賣點：
DreamStore
地址：灣仔東方188商場二樓256號舖
電話：25753285
Konami香港代理：龍勇香港有限公司
查詢電話：22468113