德國保時捷車廠，先後推出多款高性能跑車，供一眾車手落場拼過你死我活；到最近，廠方又宣布會於今年10月左右，推出全新911GT3RS高性能跑車，務求令一班車迷可有新嘅「心儀對象」。
全新911GT3RS跑車，係適合用於GT賽例規管下嘅比賽，而產量更不會低於200部，以滿足保時捷Fans，同埋一班喜愛賽車運動人士嘅需求。外觀上望落與其他911跑車相近，但就改換上尺寸較大嘅跑車合金胎軨，以及用上白色襯藍或紅色GT3RS字樣作車身顏色配搭，當然唔少得重有巨型尾翼啦！車內則裝有防滾架，並有跑車桶椅配備㖭！不過值得一提嘅係，新車以一台3.6公升水平對向六汽缸引擎作動力核心，馬力輸出高達381ps/7300rpm，加上輕量化嘅車身配搭，難怪新車除能做到0-100公里僅4.4秒，同埋極速可高達306km/h嘅紀錄外，就連馬力輸出與車重比例，亦較911GT3ClubSport版本來得更好，從而能做到更出色嘅表現呢！