夏日炎炎，可以消暑嘅方法層出不窮，除了在家中開大冷氣機外，到咖啡屋食件蛋糕、飲杯果汁亦教人神往。最近有間專做果汁嘅舖頭，將環境改成竹林深處間，食客甫進內，恍如置身於寧靜的叢林間，遠離煩囂，盡情享受特製嘅果汁。
記者：何善華
攝影：周旭文
這間開業近半年的咖啡屋，前身是一間專做外賣果汁生意嘅店舖。但負責人Ray表示，將食店改裝成一間可以讓食客「安安樂樂」坐低飲杯果汁嘅咖啡屋，是幾經考慮的決定。Ray說，幾個股東當初原先決定將店舖改裝成一間兼賣車仔麵及果汁的「雜店」，但想落又覺得食物形式格格不入，最後遂決定改行「歐陸風味」配以特製果汁為食店主題，實行一個大翻新將整間食店嘅格局完全改變。
「我哋特意請咗幾位以前喺郭富城開嗰間餐廳做過嘅廚師，重新炮製幾款法國及意大利嘅菜式，有不少食客品嘗過後都大讚食物質素同喺法國露天餐廳嘅差不多，所以午市和晚市嘅黃金時段，咖啡屋都有不少熟客仔幫襯。」Ray話見到咁好生意，更堅定地表示當切摒棄「廉價車仔麵」嘅決定係啱嘅，而家大家都鬆了一口氣了。
Ray表示，果汁生意仍然是餐廳嘅主要賣點，當然咖啡屋不時調配新款果汁口味，亦是贏得一眾果汁愛好者長期追捧的原因，現在多了幾款歐陸套餐，只是供食客有多一點選擇。餐廳位置喺太子區較「偏遠」嘅地方，可謂「旺中帶靜」，絕對是消暑乘涼嘅最佳地方。
一幅構圖好靚嘅菜式，遠看好似雜草叢生，但品嘗時卻有一番園林景致的色彩。來自南美洲智利的鮑魚仔，加埋天使麵配以自調的龍蝦汁，香噴噴熱燙燙，想必令你回味無窮。
由菠蘿和香橙混合而成的「夏日陽光」，是咖啡室最新調配的果汁，享受完啖啖鮮香的果汁後，再細嘗一件芒果慕絲蛋糕，「小食多滋味」，甜而不膩。
同樣是特別菜式之一，菠菜闊麵香爽之餘亦不失「彈牙」本色，配以野菌菇等材料更能引發食慾。蘸上忌廉汁後菠菜闊麵的味道更能發揮，是很有法國feel的一道菜式。
這是較少見的菜式，羊仔膝味道堅持原用羊隻本身的原味，將羊隻「起骨」亦花去相當時間，再利用紅酒點綴羊仔膝更能成功「搶味」。
這杯命名為「一定要飲」的果汁堪稱咖啡屋鎮店之寶，亦是最多顧客order的果汁之一。由苦瓜、番石榴、菠蘿、蘋果等新鮮生果「濃縮」而成的果汁，口感甜膩，多層生果感覺縈繞口中，記得、記得、記得一定要飲！
EnjoyCafe
地址：旺角花園街232-242號地下F店(近太子地鐵站)
電話：23806883
營業時間：12:00nn-11:15pm,12:00nn-9:30pm(逢星期日)