有趣keepfit器材夠潮

古語有云「勤有功、戲無益」，但其實一邊遊戲，都可以一邊健身，今期《至Fit新潮流》就介紹六款由日本入口的keepfit器材，造型得意可愛，又別具健身功效，最適合既想keepfit又怕悶的朋友。　文：盧漢傑圖：張家俊　模特兒：DomLeongfromJamcast

瘦身甲蟲板
售價$780
玩法同HelloKitty健身轆相似，主攻收腹，但和HelloKitty健身轆不同之處，是板下有六個車轆，可多方向轉向，有助收緊腰部兩側。
美觀度：★★★　功能度：★★★★★
好玩度：★★★　抵買度：★★★★

瘦身騎馬機
售價$9800
以模仿騎馬動作，收實臀部、腰及大腿，騎馬機有九個不同速度、三個難度程式，隨機附送錄影帶，介紹不同上半身伸展及拉筋運動，咁就全身都可以keepfit。
美觀度：★★★　功能度：★★★★
好玩度：★★★★★　抵買度：★★

音樂啞鈴
售價$368
女士們玩健身往往因為悶而半途放棄，呢個一磅重音樂啞鈴，搖擺時就會不斷播放音樂，增加健身的樂趣。
美觀度：★★★★　功能度：★★★
好玩度：★★★★　抵買度：★★★★

坐地Boxing
售價$980
潮流興打Boxing健身，但次次上健身中心上堂都幾費時，買個坐地Boxing放在家中，連一對拳套，幾時都可以練習Boxing。
美觀度：★★★★　功能度：★★★★★
好玩度：★★★★　抵買度：★★★

HelloKitty健身轆
售價$498
健身轆玩法簡單，只要雙膝跪地，雙手緊握手把向前推，然後用腹肌帶動上身回升；經常做健身轆，可以鍛煉手二頭肌同腹肌，呢個健身轆重有Hellokitty公仔，最適合kitty迷，更有螢幕顯示，計算次數同消耗的卡路里。
美觀度：★★★★★　功能度：★★★
好玩度：★★★★　抵買度：★★★

多功能健身橡筋
售價$298
多功能健身橡筋雖然設計簡單，由橡筋連接手把及腳把，但可以變成划艇、背部伸展、sit-up等器材，一物多用，練齊全身肌肉。
美觀度：★★　功能度：★★★★
好玩度：★★★　抵買度：★★★★
5★最高