買名牌，唔一定係貪慕虛榮。樂施會由今日開始舉行名牌義賣周，大批由善心人捐出嘅名牌貨，包括EmporioArmani、Moschino、Prada、ChristianDior嘅衫、裙、手袋，都以新貨三分一或以下嘅價錢發售，雖然大多屬二手貨，但最少都有8成新淨。平買名牌兼且可以做埋善事盡顯愛心，美麗可人嘅你，又點止係一身名牌裝扮咁簡單。
記者：馬慶武 攝影：陳盛臣
Model：Junko(Sunspot)
逢星期一至三出版
樂施商店經理Anne話佢哋會對收番嚟啲名牌貨作嚴格檢查：「其實捐得出嚟嘅，都好少機會係假貨，不過我哋啲義工都會做足資料搜集，盡量保證售賣嘅係真貨。另外，我哋會要求捐貨者先清洗乾淨貨品至拎嚟，如果發現有污迹，都會自己攞去乾洗，如果太舊的話都唔會賣，最少要有8至9成新。」
每年舉行兩次嘅樂施會名牌義賣周，售賣嘅都係highfashion名牌服裝，所以感覺會較為斯文。另外名牌手袋、高踭鞋，亦係熱賣之選，Anne話呢類較易配襯嘅accessories非常搶手，想有多啲選擇嘅就記得要早啲到喇。今次義賣周所得嘅所有收益重會撥作扶貧同發展用途，真係夠晒有意義喇。
DKNY圓點裙 愛心價$100
半透視淨色背心內可襯吊帶背心或bratop打底，隨時散發性感氣息。DKNY圓點裙係圓枱剪裁，較為鬆身舒適。
粉紅色裙加上喱士網花低胸設計，非常高貴，不過只適合宴會穿着，如果着嚟返工去街就太誇張喇。
雙層縐邊長紗裙，極有層次感，而且保養極佳，同全新貨無乜分別。
灰色吊帶裙的通窿設計，透出底裙的桃紅色，令黑色底色中布滿一點點桃紅小圓點。斯文中見性感，最啱着去Ball。
麖皮鞋身上加有數朵皮製花花，感覺青春一點。
不規則的剪裁設計配上輕紗用料，更有飄逸感覺，襯埋Moschino及膝半截裙，唔太隆重，OL着返工都得。
豹紋圖案，以馬毛為造料，搶眼有型。
Dior經典Monogram花文件袋，OL要帶文件出去開會就最啱用。
長約30cm嘅布製手袋，可作側孭用；值得一提係新淨程度絕對超過9成。
較新款嘅ChristianDior馬毛手袋，可側孭。不過只有約15cm長，容量不大。
容量極大嘅旅行袋，附有真皮孭帶可作斜孭用，估計新貨價接近1萬蚊。雖然呢個係二手貨，但內外都極新淨。
屬全新貨，而且係女裝熱門呎碼，所以一定搶手。
意大利名牌Ferragamo出品，鞋底有少許花痕，約8成新。
Junko係日本人，正職係空姐，對買名牌同扮靚都好有研究。「啲貨相當新淨，有啲新到唔似二手貨，而且價錢真係好平，我就鍾意ArmaniExchange條連身裙，賣$200真係好吸引。而且買衫可以做善事，梗係要支持啦。」。
Christine：「今次義賣周最正梗係啲名牌高踭鞋啦，鞋款好新，我諗上手鞋主都只係着過一兩次咋，而且好新淨，所以都唔介意係二手貨。」
Sharon：「好抵，而且啲貨好新，都唔似係二手舊貨。不過覺得啲款式太過斯文，唔係太啱平時出街着，所以興趣不大。」
義賣地點：樂施商店（中環康樂廣場1號怡和大廈低層8號舖/25221765）
義賣日期：今日至7月12日（12:30pm至5:00pm）