大市發展暫處微妙時刻，政府就第23條鬆章，願意就最多人關注嘅其中3項條文作出修訂，應屬好事，但堅持7.9提出二讀三讀，民主黨同法律界唔收貨。呢兩日，政府態度會係點？若然死撐後日立法，示威局面又會係點？若然後日開會，保皇黨支持立法，個局勢又會點？若然過唔到立法會，個局勢又會點？
好多變數，可能變好可能變壞，恒指升二三百點又似，跌二三百點又似，高低波幅有五百點。唔想預測局面發展係點，或者冇把握估得中係點發展嘅，最好企埋一邊，唔買唔賣。
中石油（857）由上月底2.425元散落嚟，低見2.10元後有機會定得住，上周五收2.15元。中石油Call輪9232，11月到期，現價57仙，負溢價2.1%，槓桿率3.8倍，見低位可以諗吓博反彈，槓桿率雖然唔大，但負溢價着數番。另外隻遠期Call輪9797亦抵買，槓桿率4.1倍，溢價只係2.3%，明年6月先至到期。
中海油（883）近期堅俏，距歷來高位唔遠，吼回順之時，執些少Call輪玩短線，對象係9535，今年年底到期，現價18.3仙，溢價4%，槓桿率6.3倍。
中石化（386）上周五跌4仙，收1.81元，若再跌幾格，吼Call輪9379，下月杪夠鐘，現價34仙，溢價0.6%，槓桿率5.3倍。
章盛