蠢人冇藥醫，在如此嚴峻形勢下，董建華領導的特區政府草草修訂23條，仍想快刀斬亂麻在7月9日進行23條立法，真係完全不知進退，處事如此胡塗的政府，怎不教人絕望。
港股上周五企硬，主要是市場憧憬23條會押後立法，如今希望破滅，港股今日可能會跌番夠本，相信愈近七九，撤離市場的資金會愈多。
港股過去兩個星期展開調整，一直守於250日線之上，今次借港府強行23條立法，有機會跌穿，回補5月26日9411至9313的上升裂口。不過現階段造淡亦是充滿風險，一來港府隨時突然轉軚；二來就算董建華想自絕於港人面前，但中央亦不容香港出現動亂，最終的局面可能是棄車保帥，到時將刺激港股大升。
現時港股進入政治市，走勢不易估計，一般散戶較穩妥的策略，當然是暫時離場觀望，直至23條立法出現較明朗的情況。
趙飛雲貼市，所以仍會玩吓即市窩輪，選擇仍以Put輪為主，恒指Put輪仍是揀9789，行使價9600，9月29日到期，溢價4.84%，槓桿22.4倍，數據相當合理。
揀呢隻輪另外一個原因就係莊家似用電腦做盤，對指數升跌十分敏感，比較跟貼市走，唔似部份窩輪由人手操控，應升唔升或應跌唔跌。當然，反應敏捷亦有壞處，就是指數一旦出現較大郁動時，冇機會買平貨。
23條對地產股影響較大，新地（016）短期走勢不樂觀，但Put輪選擇少，成交太疏。可留意長實Put輪9744。
趙飛雲